Бэҕэһээ, олунньу 24 күнүгэр “Этигэн Хомус” национальнай музыкальнай бириэмийэни туттарыы буолла.
Татьяна Маркова, «Саха сирэ» хаһыат, https://edersaas.ru/
Хас биирдии номинацияҕа кырата биэстии ырыаһыт күөн көрсөрүн иһитиннэрбиппит. Дьэ оттон түмүктүүр кэнсиэргэ бэҕэһээ дьүүллүүр сүбэ лауреаттары быһаарда.
Онон, билсиҥ, ХVII музыкальнай күрэх кыайыылаахтара бу бааллар:
“Сыл арыйыыта” – Михаил Уманов
Эр дьоҥҥо “ 2017 сыл бастыҥ ырыаһыта” – Константин Степанов
Кэрэ аҥардарга “2017 сыл бастыҥ ырыаһыта” – Алена Яковлева
“Сыл бастыҥ хита-2017” – Василий Еремеев “Билэҕин дуо?”
“Ураты музыкальнай сүүрээн” – Айыллаана Семенова
Уонна “Бастыҥ аранжировщик” анал аат Иван Наумовка иҥэрилиннэ
Оттон “Саха ырыатын сайыннарыыга кылаатын иһин” “Сахалыы Виктория ” анал бирииһэ Владимир Индигиирискэйгэ туттарылынна.
Бу сыл биир чаҕылхай музыкальнай тэрээһинин ким режиссердуура өргө диэри сэкириэккэ тутуллубута, оттон билигин, бириэмийэни туттарыы этэҥҥэ ааспытын кэннэ, биһиги кини аатын бука бары билэбит.
Онон, “Этигэн Хомус-2017” режиссерун Захар Никитин санаатын истиэҕиҥ:
— “Виктория” радиостанция Генеральнай дириэктэрэ Александр Дмитриевич Глотов ыҥыра сылдьыбытын, тыйаатыр режиссера буоллаҕым, онон, эстрада эйгэтигэр соччо холоно илик буоламмын, бастаан сөбүлэспэтэҕим. Бу иннинэ тэрээһиннэри бииргэ үөрэммит табаарыһым Евгений Охлопков бэркэ режиссердаан ыытара… Онтон быйыл Александр Дмитриевич уонна Анна Исакова кэпсэппиттэригэр сөбүлэһэн, ылыстым. Онуоха, Байбал Сэмэнэп сольнай кэнсиэригэр режиссердаан, эстрадаҕа режиссер быһыытынан сүрэхтэммит тэҥэ буолуум, көмөлөстө быһыылаах. Быйылгы “Этигэн Хомус” саамай улахан массовкалаах буолла – 200-чэкэ киһи кытынна. Стадионнай тэрээһин курдук, киэҥ хабааннаахтык, масштабтаахтык ыыта сатаатым. Көннөрү киһи хараҕар хатаммат кыра итэҕэс-быһаҕас ханна барыай, баар буоллаҕа. Инникитин ол болҕомтоҕо ылыллыан наада. Бэйэм режиссер быһыытынан, Зарина Копырина профессиональнай таһыма үрдээн иһэрин бэлиэтиэм этэ. Дьон сүрэҕин тутта. Хотугу улуустан Михаил Уманов “Чуоркаҕа” ырыатынан үгүс-элбэх истээччи биһирэбилин ылыан ылла.
Манна даҕатан эттэххэ, режиссер, быйылгы “Көрөөччү биһирэбилэ” бирииһи быһаарыыга саҥа сүүрээни киллэрдэ – хас биирдии көрөөччү сөбүлүүр ырыаһытыгар анаан салама баайда.
Бүгүн киэһээ 19 чаастан Суорун Омоллоон аатынан Опера уонна балет тыйаатырыгар “Этигэн Хомус-2017” кыайыылаахтарын гала-кэнсиэрэ буолар.
Татьяна Маркова, «Саха сирэ» хаһыат, https://edersaas.ru
Хаартыска: Интэриниэттэн