Бу туһунан СӨ Бырабыыталыстыбатын отчуотун чэрчитинэн Саха НКИХ канаалларынан вице-премьер Михаил Никифоров кэпсээтэ.
Өрөспүүбүлүкэҕэ быйылгыттан эти соҕотуопкалааһын тиһигэр үүтү туттарыыга майгынныыр анал механизм үлэлиэҕэ. Ол курдук, муниципальнай оройуоннарга миэстэтигэр эти тутар тыа хаһаайыстыбатын табаары оҥорооччута баар буолуоҕа. Бу тэрилтэ СӨ тыа хаһаайыстыбатын министиэристибэтэ быспыт сыанатыттан кырата суох сыанаҕа табаары оҥорооччулартан эт бородууксуйуны тутуоҕа.
2022 сылга 815 туонна ынах уонна 284 туонна сылгы этин атыылаһарга барыта 74 мөл солк көрүллүбүт.
Ону сэргэ тыа хаһаайыстыбатын потребительскай кэпэрэтииптэрин материальнай-техническэй базаларын сайыннарыыга субсидия быһыытынан грант бэриллиэҕэ. Бааһынай уонна фермер хаһаайыстыбаларыгар «Агростартап» бырайыагынан убойнай пууннары тутуохха эмиэ сөп.
Быйыл үүккэ уонна үрүҥ аска бүддьүөттэн төһө үп көрүллүбүтүн манна аах.
СӨ Ил Дарханын уонна Бырабыыталыстыбатын Пресс-сулууспата