Кимиэхэ да маарыннаабат ураты туруорууларынан хайыы-үйэ дьоҥҥо биллибит эдэр режиссер Динислам Тутаев Үүнэр көлүөнэ тыйаатырыгар Александр Островскай «Гроза» драматын туруорда.
Татьяна Маркова, https://edersaas.ru
Премьера сарсын, кулун тутар 9 күнүгэр, 17.00 чаастан ТЮЗ-ка буолар.
Сценографиятын, көстүүмнэрин Егор Аммосов оҥордо. Уус-уран салайааччы — саха норуодунай артыыһа Алексей Павлов.
Сэрэйбиккит курдук, бу классическай пьеса букатын атыннык, аныгылыы туруорулунна.
Артыыстар да оонньуулара ураты.
Сүрүн оруоллары эдэр артыыстар Владислав Портнягин, Катя Хоютанова толороллор. Марина Корнилова Тихон ийэтин — Кабаниханы оонньуур. Герой-любовник оруолугар — Никита Соловьев. Тихон эдьиийин Анна Флегонтова оонньуур.
Дьиҥэр, айымньыга Кабаниха бастакы оҕото — Тихон, онон кини эдьиийдээх буолбакка, балтылаах буолуохтаах этэ.
Дьэ бу манна, тыйаатыр термининэн эттэххэ — режиссер «көҥүл сочинениета» көстөн кэлэр.
Динислам Тутаев, режиссер:
— Тихон иккис оҕо буолбута, оттон Варвара (Анна Флегонтова) эдьиий, Кабаниха бастакы оҕото буолбута пьесаҕа улахан оруоллаах. Ону барытын арыйан кэбиспэппит. Пьесаҕа кэллэххитинэ, бэйэҕит көрөн сыаналыаххыт.
Манна даҕатан эттэххэ, режиссер сорох персонажтары букатын да соппут, ол оннугар айымньыга суох персонажтар киирбиттэр. Тоҕо?
«Дьэ, онно хоруйу премьераҕа кэлэҥҥит ылыҥ», — диэн ТЮЗ артыыстара таайтаран эттилэр.
Татьяна Маркова, https://edersaas.ru