Бу күннэргэ «Крестьянскай» ырыынакка сылдьыбыт дьон ордук эт сыаната үрдүгүттэн саллыбыттарын туһунан этиннилэр. «Ама да буолтун иһин, уустук сайын ааспытын иһин эт сыанатын итинник үрдэтэллэрэ сыыһа”, — дииллэр. Ол курдук, билигин эт киилэтэ 600 солк. саҕалаан 800 солк. диэри анньыллан турар. Итини тэҥэ, үүт, балык, отон эгэлгэтэ элбэх. Биир өттүнэн өбүгэлэрбит төрүт астарын аһыахтаахпыт диэн буолар да, итинник ытырар сыаналаах буоллаҕына, хайдах атыылаһан сиибит.
Онон сыана хайаан да хонтуруолланыан наада буолбут, биир тылынын этэр буоллахха, уолдьаспыт. СӨ Сыана бэлиитикэтигэр судаарыстыбаннай кэмитиэтэ иһитиннэрэринэн, ааспыт ыйдааҕы туругунан, өрөспүүбүлүкэбитигэр бородуукта сыанатын үрдээһинэ биир тэҥ соҕус эбит. Бородуукта сыаната судаарыстыбанан сүрүннэммэт. Хаһаайыстыбаннай тэрилтэлэр сыананы бэйэлэрэ быһаллар, быһаараллар диэн. Хайдах эрэ дии санаабаккыт дуо? Хонтуруолланыахтаахтара буолуо дии.
Дьон санаатын истиэҕиҥ. Норуот сыыспат, кырдьыгы этэр аналлаах.
Марианна Васильева, Дьокуускай олохтооҕо:
—Дьэ кырдьык эт сыаната олус ыарахан. Бу күннэргэ баара-суоҕа биэс киилэ эти ылаарыбын карточкабын «кураанахтаабытым». Ол иһин мантан инньэ, холобур, «Мясной двор” маҕаһыынтан эти киилэтин 420 солк. атыылаһыам, биллэн турар, иркутскайдар эттэрэ. Сыананы кытаанах хонтуруолга ылаллара буоллар.
Анастасия Попова, куорат олохтооҕо:
— Эт сыаната барыбытын долгутара буолуо. Сотору халлаан тымныйдаҕына, сыллааҕы эппитин миэстэнэн ылыахпыт. Билигин ити аҕыйах киилэниини ырыынактан ылабыт эрээри, сыаната күн-түүн үрдээн иһэрэ сөхтөрөр. Маннык буоллаҕына, били, соевай дэниллэр этинэн аһылыктанарбыт буолуо.
Сэтинньи ортотун диэки Дьокуускайга ырыынактартан саҕалаан, СӨ Тыатын хаһаайыстыбатын министиэристибэтин иннигэр баар былаһааккаҕа тиийэ эт арааһын, үүт аһы-үөлү былырыыҥҥы курдук атыылыахтара турдаҕа. Дьэ онно сыананы сөбүгэр соҕус көрөн хонтуруоллаан атыылаталлара буоллар диэн баҕа санаалаахпын. Былырыын ынах биир хаанын 1500 солк. атыылыы туралларын көрөн олус да сөхпүтүм. Ама быйыл итинник сыана буолбат ини.