Эстрада тыйаатырыгар РСФСР үтүөлээх артыыһа Юрий Егорович Платонов аата иҥэрилиннэ.
СӨ Ил Дархана Айсен Николаев 2021 сыл олунньу 11 күнүгэр бу туһунан ыйаахха илии баттаата диэн СӨ Култуура уонна духуобунай сайдыы министиэристибэтин пресс-сулууспата иһитиннэрдэ. «РСФСР уонна Саха АССР үтүөлээх артыыһа, СӨ норуодунай артыыһа Юрий Егорович Платонов өрөспүүбүлүкэҕэ эстрада ускуустубата сайдарыгар сүҥкэн кылааты киллэрбитин сыаналаан туран, кини аатын «СӨ Эстрада судаарыстыбаннай тыйаатырыгар» иҥэрэргэ», — диэн докумуоҥҥа суруллар.
Юрий Платонов аатын бу тыйаатырга иҥэрэри кэлэктиип көҕүлээбитэ, туруорсубута. Юрий Егорович Платонов Саха сирин култууратын сайдыытыгар сүҥкэн кылааты киллэрсибитэ, эстрада тыйаатырын, ускуустубатын устуоруйатыгар бэйэтин суолун хаалларбыта. Юрий Егорович Арассыыйа композитордарын, саха мелодистарын уонна норуот ырыаларын ыллыыра, көрөөччүлэргэ киэҥник тарҕатара. Юрий Егорович төрөөбүт кыраайын, кини хатыламмат кэрэтин туһунан кэрэ куолаһынан ис сүрэҕиттэн долгуйан ыллыыра дьон сүрэҕин, дууһатын тутара. Репертуарыгар баар табаһыттар, балыксыттар, булчуттар, тыа сирин үлэһит дьонун тустарынан ыллыыр ырыалара сүрэҕи-быары ортотунан ураты нарыннык туойуллан киирэллэрэ, Хотугу сиргэ аан бастаан кэлэн олохсуйбут казактар тустарынан туойара, тус бэйэтин тылларыгар ырыалардааҕа. Кэрэ куоластаах ырыаһыт Саха сирин сэргэ, ССРС киэҥ нэлэмэн сиринэн-уотунан бүттүүнүнэн гостуруоллаабыта. Магаданынан, Иркутскай, Амур уобаластарынан, Монголиянан сылдьыбыта.
Кини айар үлэтэ Ленинградка Римскэй-Корсаков аатынан консерватория вокальнай отделениетыгар үөрэнэ киириэҕиттэн, 1965 сылтан саҕаламмыта. 1967 сыллаахха Ойуунускай аатынан саха судаарыстыбаннай музыкальнай-драматическай тыйаатырыгар солист-вокалиһынан үлэҕэ киирбитэ. Эһиилгитигэр Култуура министиэристибэтэ кинини Москаҕа Бүтүн Арассыыйатааҕы эстрада ускуустубатын мастарыскыайыгар (ВТМЭИ) стажировкаҕа ыыппыта, ону 1969 сыллаахха бүтэрбитэ.
Дойдутугар эргиллэн кэлиэҕиттэн, төрөөбүт Сахатын сиригэр эстрада ускуустубатын кэҥэтэр, сайыннарар туһуттан, Москваҕа үөрэммит кыһатыгар (ВТМЭИ) талааннаах ыччаты үөрэттэрэ ыытыынан ылсан, турунан дьарыктаммыта. Кини көҕүлээһининэн 1970 сыллаахха билигин биллэр-көстөр ааттаах-суоллаах артыыстар, оччолорго 15 киһи үөрэххэ барбыта: Сергей Расторгуев, Марфа Колесова, Федор Колосов, Владимир Заболоцкай, Наталья Кирюшкина (Шестакова) уо.д.а. Юрий Егорович көҕүлээн уонна бэйэтэ кыттан, «Радуга» (1975) бөлөх, «Мелодии Севера» ВИА (1983-90) тэриллибиттэрэ.
1990 сыллаахха Саха судаарыстыбаннай филармониятыгар Юрий Егорович ааптарыскай оскуолатын кэнсиэпсийэтинэн эстрада ускуустубатыгар өрөспүүбүлүкэтээҕи айар мастарыскыай тэриллибитэ (РТМЭИ), 1996 — 2015 сылларга М.К.Аммосов аатынан СГУ үлэлээбитэ. Манна интеграционнай систиэмэнэн 108 киһи үөрэммитэ, итинтэн 33 киһи эстрада артыыһа буолбута. Юрий Егорович үөрэнээччилэрэ, билигин эстрада биллэр артыыстара: Герман уонна Клавдия Хатылаевтар, Лариса Троева, Чыскыырай, Варвара Аманатова, Сахаайа, Лэгэнтэй, Сиэйэ уола, Саарын, Уруйдаана Харитонова, Ангелина Файрушина, Тамара Попова, Мирослав Егоров уо.д.а.
Юрий Егорович М.К.Аммосов аатынан ХИФУ фольклорга уонна национальнай култуураҕа хаапыдыратын доценынан үлэлээбитэ. Музыка элементарнай теориятыгар тэттик ыйынньык («Развитие певческого голоса» циклтан), хас да монография уонна өрөспүүбүлүкэҕэ эстрада ускуустубатын сайыннарыы устуоруйатыгар научнай үлэлэр ааптардара, эстрада тыйаатырын үбүлүөйдэригэр анаммыт түөрт буклеты оҥорбута, «Якутская эстрада глазами очевидца» кинигэ ааптара.
Юрий Егорович өрөспүүбүлүкэҕэ эстрада ускуустубатын сайыннарыыга кылаатын иһин «Саха АССР үтүөлээх артыыһа» (1981 с.), «РСФСР үтүөлээх артыыһа» (1991 с.), «СӨ норуодунай артыыһа» (2002 с.) үрдүк ааттары ылбыта, «Гражданскай килбиэн» бэлиэнэн наҕараадаламмыта, Мэҥэ Хаҥалас уонна Уус Маайа улуустарын Бочуоттаах гражданина буолбута.