Еdersaas.ru: хайдах саҕаламмытай?

Бөлөххө киир:

Үгүс саха дьонун интэриэһин таппыт edersaas.ru сайт сэтинньи 25 күнүгэр үлэтин саҕалаабыта биир сыл буолла. Онон сибээстээн, сахалыы тыллаах сонуну бастакынан тарҕатар сайт хайдах толкуйдаммытын уонна биир сыллаах үлэ түмүгүн билиһиннэрэбит.

“Саха дьоно аахпат буолла” диэн өйдөбүл сыыһа, ол оннугар саха ыччата сахалыы ааҕара аччаата диирбит оруннааҕа буолуо. Бу барыта – интэриниэтинэн үлүһүйүүттэн, батсаапка, инстаграмҥа олоруу элбээбититтэн, быһата, олох сайдыытын кытта баар буолбут көстүү. Кырдьык даҕаны, күнү быһа илиибитин төлөпүөммүтүттэн араарбаппыт, онтон сонуну билэбит, дьыаланы-куолуну быһаарсабыт, доҕотторбутун кытта кэпсэтэбит. Ол эрээри, биир сыллааҕыта интэриниэккэ төрөөбүт тылбытынан уу сахалыы кэпсэтэр, ааҕар, ырытыһар хонуу суох этэ. Сайдыыны кытта тэҥҥэ хаамсаары, этэргэ дылы, хаалсымаары, биһиэхэ “сахалыы сайт толкуйдуохха” диэн санаа киирбитэ.

Санаа санаанан, оттон дьиҥнээх хамсааһын 2015 сыл сайыныттан саҕаламмыта. “Саха сирэ” хаһыат “Эдэр саас” ыччакка аналлаах сыһыарыытын эрэдээктэринэн анаммыта биир сыл даҕаны буолбатах Надежда Самсонова бүтүн Арассыыйатааҕы “Таврида” ыччат форумугар кыттыбыта. Ол кэнниттэн Дьокуускайга СӨ Ил Дарханын Егор Афанасьевич Борисовтыын Саха сириттэн бу форумҥа кыттыбыт ыччаты кытта көрсүһүү буолбута. Онно Егор Афанасьевич: “Ким, туох бырайыактааҕый? Этиилэргитин күүтэбин”, — диэбитигэр, Надежда хап-сабар: “Саха ыччата сахалыы ааҕарыгар анаан “Эдэр саас” хаһыат баазатыгар сайт уонна онно төлөпүөн сыһыарыытын оҥоруохпутун баҕарабыт”, — диэбитэ. Ол күн Ил Дархан, Ыччат дьыалаларын уонна дьиэ кэргэн бэлиитикэтин министиэристибэтэ соһуччу уонна сонун этиини тута өйүүллэрин туһунан биллэрбиттэрэ.

Уһата барбакка, сайт уонна сыһыарыы оҥоһулларыгар харчы көрүллэн, толкуйдаабыппытын олоххо киллэрэн барбыппыт. “Саха сирэ” хаһыат  оччотооҕу эрэдээктэрэ Чокуур Гаврильев, “Эдэр саас” сыһыарыы эрэдээктэрэ Надежда Самсонова, суруналыыстара Айтана Аммосова, Ульяна Захарова, Станислав Иовлев буолан хамаанда тэринэн, биир сыл иһигэр араас санаалары сыымайдаан, сайт хайдах буолуохтааҕын ырытан, ис тутулун толкуйдаан,  дизайнын ойуулаан таһаарбыппыт. Онтон 2016 сыл атырдьах ыйыгар сайт бэлэм сиппит-хоппут бырайыагын үрдүкү салалтабытыгар — “Сахамедиа” медиа-холдинг генеральнай дириэктэригэр Кирилл Алексеевка билиһиннэрбиппит. Кини тута бырайыагы биһирээн: “Сайткытын аны дьыалаҕа киллэриҥ, оҥорон саҕалааҥ”, — диэн сөбүлэҥин биэрбитэ. Атырдьах ыйыттан сэтинньигэ диэри Стас Ноев салайааччылаах айтишниктар хамаандаларын кытта үлэлэһэн, сайты оҥорон, чочуйан, матырыйаалынан толорон барбыппыт. Бу билигин кэлэн суруйарбыт курдук судургу буолбатах этэ, тустаахха уустуктардаах, элбэх моһуоктаах этэ.

Онон, сайтпыт балтараа сыл иһинэн толкуйданан, ымпыгын-чымпыгын түөрт ыйынан ситэн, былырыын сэтинньи 25 күнүгэр сүрэхтэниитэ буолбута. Бэлиэ түгэни «Эдэр саас» ыччат хаһыата 23 сааһын кытта дьүөрэлээн бэлиэтээбиппит (хаһыат 1993 сыл сэтинньи 18 күнүттэн тахсар). Хаһыат доҕотторо, дьоруойдара, оройуон ыччатын лидердэрэ, министиэристибэлэр, ырыаһыттар, суруналыыстар эҕэрдэлээбиттэрэ.

Ыччат миниистирин бастакы солбуйааччы Василина Лукина, оччолорго гражданскай уопсастыба институттарын сайыннарыы миниистирин бастакы солбуйааччы Савва Михайлов, профессиональный үөрэхтээһин миниистирин солбуйааччы Гавриил Семенов саҥа сайт кэскиллээх буолуоҕа диэн эрэнэллэрин эппиттэрэ. Биэчэри «Х-Upp» бөлөх, Алексей Потапов, Эрхаан, Юлиан Семенов, хомусчут Василена Шарина киэргэппиттэрэ. Онно «Сахамедиа» медиа-холдинг генеральнай дириэктэрэ Кирилл Алексеев: “Билигин Саха сиригэр киэҥ далааһыннаахтык, хаачыстыбалаахтык үлэлиир сахалыы тыллаах электроннай ресурса суоҕун тэҥэ. Онон edersaas.ru сайт биир бастыҥынан буолуоҕа дии саныыбын”, — диэн бэлиэтээн эппитэ туолла диэн сайт суруналыыстара даҕаны, ааҕааччылара даҕаны саныыбыт.

Бастаан сайт барыла “Эдэр саас” хаһыат баазатыгар толкуйдаммыта. Онон, ыччакка аналлаах, ыччат кыһалҕаларын суруйар, ыччат тэрээһиннэрин сырдатар диэн оҥоһуллубута. Онтон кэлин ыччакка эрэ туһаайыллыбатын, бүтүн саха дьонугар ананнын диэн буолбута. Ол эрээри, бастаан былааннаммыт аатынан еdersaas.ru диэн хаалларарга санаммыппыт.

Сайты кытта тэҥҥэ “Эдэр саас” мобильнай сыһыарыы эмиэ толкуйдаммыта, олоххо тэҥҥэ киирбитэ. Сыһыарыыны PlayMarket эбэтэр App Store маҕаһыынтан “ЭДЭР СААС” диэн булан хачайдыахха сөп. Саҥа матырыйаал тахсыбытын сыһыарыы эйиэхэ “хобуоччулаан” биэрэр.

Сайты оччоттон баччаҕа диэри «Саха сирэ» хаһыат эрэдээксийэтэ оҥорон таһаарар. Ол аата, суруналыыстар күннэтэ сайты сонуннарынан толороллорун, ону тарҕаталларын ааһан, нэдиэлэ ахсын тахсар “Саха сирэ” хаһыаты оҥороллор. Оттон “Эдэр саас” сыһыарыы суруналыыстара уонунан сыллар тухары «Саха ыччатын — промышленноска» идэҕэ туһаайар экспедицияны, «Саха ыччатын — тыа сиригэр» илиинэн үлэҕэ күрэхтэһиини, Ыччат ыһыаҕын пресс-киинин, араас өй оонньуутун тэрийэн ыытан кэллилэр. Манан барытынан биир хаһыат дьоҕус эрэдээксийэтэ дьарыктанар диэтэххэ баһаам элбэх үлэ буолар.

Edersaas.ru сайтка биир сыл иһигэр 380 000 ааҕааччы киирэн, сибиэһэй сонуннары, умсугутуулаах интревьюлары, интэриэһинэй кэпсээннэри аахтылар, толкуйдатар тургутуктары толордулар, дьоҕус видео-устуулары көтүппэккэ көрдүлэр-иһиттилэр. Билиҥҥи туругунан, сайтпытыгар күннэтэ 5000 киһи киирэр. Саамай ааҕыллыбыт, ааҕааччы биһирэбилин ылбыт матырыйаалларынан буоллулар: Ангелина Васильева “Эдэр ыаллары дьиэлииргэ федеральнай үп көрүлүннэ” матырыйаалын 14990 киһи аахпыт; Уус Алдаҥҥа таһырдьа кыстаабыт борооску туһунан Иван Ксенофонтов суруйбут матырыйаалын 22253-тэ көрбүттэр; “Сахалыы сөпкө суруйаҕын дуо?” диэн тургутук 34817-тэ толоруллбут. Бу суруйуулары таһынан, дьон интэриэһин тардыбыт, ырытыы таһаарбыт матырыйааллары ааҕан сиппэппит.

Билигин edersaas.ru сайт матырыйааллара Facebook, Vkontakte, Instagram, Twitter, YouTube социальнай ситимнэргэ онлайн тахса тураллар. Онно биһигини 50 000 тахса киһи ааҕара санаабытын көтөҕөр, инникигэ кынаттыыр.

«Саха сирэ» хаһыат суруналыыстара бэлэмниир чаҕылхай матырыйаалларын  интэриниэккэ ааҕыҥ, көрүҥ, туһаныҥ! Еdersaas.ru сайты кытта бииргэ буолуҥ!

Айтана Аммосова.

+1
3
+1
0
+1
0
+1
0
+1
0
+1
0
+1
0