Хас биирдии киһиэхэ ааспыт сайын умнуллубат түгэннэри бэлэхтээтэҕэ буолуо. Кылгас, ол эрээри элбэх мүччүргэннээх, үөрүүлээх-көтүүлээх, ардыгар хомолтолоох да түгэн үс ыйустата элбэҕэ. Олортон өйдөөн хаалбыппытын санаан ааһыах.
ЕГОР ФИЛИППОВ ӨРӨГӨЙӨ
Хаҥалас хотойо Егор Филиппов Чурапчыга ыытыллыбыт «Тоҕус томтор оонньууларын» кыайыылааҕынан буолбута. Бу күрэхтэһии кэнниттэн нэдиэлэ эрэ арыттаах аны Туймаада ыһыаҕар “Дыгын оонньууларыгар” бастакы миэстэни ылан, түөрт төгүллээх чөмпүйүөн буолары ситистэ.
УУЛУССАЛАРЫ, ДЬИЭЛЭРИ КИЭРГЭТИЭХТЭРЭ
«Leto Yakutia» бэстибээл чэрчитинэн, хас биирдии куорат уонна сэлиэнньэ уратытын бэлиэтиир гына уулуссалары, дьиэлэри киэргэтиэхтэрэ. Ол курдук, Дьокуускайга, Нерюнгрига, Мииринэйгэ, Ленскэйгэ, Алдаҥҥа, Өлүөхүмэҕэ, Удачнайга, Бүлүүгэ, Покровскайга, Ньурбаҕа, Орто Халымаҕа, Дьааҥыга, Чурапчыга, Аммаҕа уонна Бэрдьигэстээххэ аныгылыы тыыннаах арт-эбийиэктэр баар буолуохтара. Хас биирдии пууҥҥа ураты бырагыраамалаах бэстибээл ыытыллыаҕа. Холобура, Нерюнгрига баар эргэ тиэхиньикэ пааркатын эбийиэктэрин уруһуйдаатылар, саҥардан биэрдилэр. Маныаха хас биирдии талыллыбыт сиртэн төрүттээх айар куттаах ыччаты эппиэттээҕинэн анаатылар. Бэстибээл сэтинньигэ диэри ыытыллыаҕа.
ЛЕОН УОННА ӨТТҮК ЛЕХА
Сайын саҕаланыыта “Инстаграм” социальнай ситимҥэ “бастакы айар киэһэбэр 21 киһи эрэ кэллэ, аны ыллаан бүттүм” диэн хомолтотун биллэрбит эдэр ырыаһыт Леонид Григорьев-Леон, хата, итинник биллэриини оҥорон, “хайп” тардыбыта. Кини, онтон эр ылан, биллэр вайнер Өттүк Лехаҕа “Бэс ыйын 8 күнүгэр ыытыллар “Азия Кубогын” кэмигэр хапсаҕайдаһыахха” диэн ыҥырыыны ыыппыта. Ити киирсиигэ Леон ыраастык кыайбыта. Санатан эттэххэ, Леон ырыаһытын ааһан, национальнай ыстаныыга спорт маастара, “Дыгын оонньууларын” икки төгүллээх кыттыылааҕа. Билигин саҥа килиибэ тахсан, “күннүү” сылдьар.
ХОРСУН СИЭСТЭРЭ КЫРГЫТТАР
От ыйыгар Өрөспүүбүлүкэтээҕи 2-с №-дээх балыыһа Суһал медицинскэй көмө киинин сиэстэрэлэрэ – дьүөгэлии Сайыына Слепцова уонна Марианна Григорьева – ууга түспүт киһини быыһаатылар. Кыргыттар үлэ кэнниттэн Дьокуускай куорат сөтүөлүүр сиригэр тиийбиттэр. Кыратык сөтүөлээн баран, күҥҥэ сытарга санаммыттар. Бу кэмҥэ аттынааҕы хампаанньаҕа баар эр киһи ууга умсубут уонна ханнык эрэ бириэмэҕэ сүтэн хаалбыт. Биир-биэс тыла суох, туораттан көмө көрдүү барбакка, кыргыттар бу киһини ууттан таһааран, олоҕун өрүһүйбүттэрэ. Ити курдук, сиэстэрэ кыргыттар хорсун быһыыны оҥордулар, өссө биир киһи олоҕун быыһаатылар.
ТҮӨРТ РЕКОРД ОЛОХТОММУТА
Аммаҕа быйыл сайын ыытыллыбыт Саха сирин спортивнай оонньууларыгар Мэҥэ Хаҥаластан сылдьар Георгий Шергин үстэ төхтүрүйэн ойууга, 15,5 миэтэрэҕэ ойон, Саха Өрөспүүбүлүкэтин саҥа рекордун олохтоото. Үөһээ Бүлүүттэн марафонец Сардаана Трофимова 5000 м. дистанцияҕа 16 мүн. 31,36 сөкүүндэ көрдөрүүлээх биэтэккэ кэлэн, Спартакиада бастакы кыһыл көмүс мэтээлин хаһаайынынан буолбута. Уус Алдан хамаандатын спортсмена Артур Бурцев, 10 000 м. сүүрүүгэ Саха сирин рекордун олохтоон, биэтэккэ 31 м. 47,80 сөкүүндэнэн кэлэн, хамаандатыгар кыһыл көмүс мэтээли аҕалбыта. Амма сүүрүүк уолаттара Роман Алексеев, Иван Шергин, Михаил Жарин уонна Леонид Филиппов шведскэй эстафетаҕа (800х400х200х100 м) 3 мүн. 21,15 сөк. кэлбиттэрэ.
АРЫЙААН ЭРЭЛИ ТҮҺЭН БИЭРБЭТ
Арыйаан Тютрин атырдьах ыйын саҕаланыыта Польшаҕа ыытыллыбыт Циолковскай аатынан норуоттар икки ардыларынааҕы турнирга чаҕылхай тустууну көрдөрөн, эрэллээхтик
чөмпүйүөннээн, сахатын дьонун үөртэ. Кини 14:4 ахсааҥҥа Казахстантан Нурислам Санаевы кыайбыта. Чахчы, чаҕылхай кыайыынан бүтүн Саха сирин олохтоохторун, тустууну таптааччыларын сэргэхситтэ уонна үөртэ.
“ТАБЫС” ЫЧЧАТ БЭСТИБЭЭЛЭ
От ыйын ортото Хаҥалас улууһун «Орто дойду» этнокомлексыгар эдэр дьон мустан бэстибээллээтилэр. Үс күн устата сүүрбэ улуус уонна биэс уопсастыбаннай тэриллии хамаандалара култуурунай, дьыалабыай уонна спортивнай тэрээһиннэргэ күрэхтэстилэр. “ТАБЫС” бэстибээлгэ уопсайа 625 ыччат кытынна. Кыайыылаах хамаанданан Мэҥэ Хаҥалас улууһа буолла. Кинилэр УАЗ-массыынанан наҕараадаланнылар.
АЙЫЫ УОЛУГАР ПААМАТЫННЬЫК ТУРУОРДУЛАР
Атырдьах ыйын бүтүүтэ Хаҥалас Улахан Ааныгар 90-с сыллар ыччатын кумира буолбут Александр Самсонов-Айыы Уолун сырдык аатыгар сүгүрүйэн, пааматынньык туруордулар. Быйыл кулун тутарга «Сэргэлээх уоттара» култуура киинигэр Айыы Уолун ырыаларынан «Ыллаа, ыллаа…» диэн кэнсиэр буолбута. Кэнсиэри Амматтан төрүттээх урбаанньыт Николай Иванов бэйэтин уонна доҕотторун күүһүнэн тэрийбитэ. Мантан киирбит үптэн ырыаһыкка пааматынньык оҥорторон, төрөөбүт дойдутугар үөрүүлээх быһыыга-майгыга арыйдылар.
Айтана Аммосова, «Саха сирэ» хаһыат, edersaas.ru