Уопсастыба

Өртөөһүн көҥүллэннэ эрээри, баһылыктар бартыбыалларын харыһыйаллар

СӨ бырабыыталыстыбатын ыксаллаах быһыыны-майгыны сэрэтиигэ, туоратыыга уонна уот куттала суоһаабатын хааччыйыыга хамыыһыйатын мунньаҕар ойуур фондатыгар киирэр сиргэ өртөөһүнү көҥүллүүр туһунан быһаарыы ылыллыбытын иһитиннэрэн турабыт.

Ойуур сыһыаннаһыыларыгар департамент салайааччытын солбуйааччы Дьулустаан Хон этэринэн, урукку сылларга ойуур фондатыгар киирэр сирдэри бэйэлэрэ хонтуруоллаан өртүүр (холобур, ааспыт 2017 сылга 17034,4 гектарга хонтуруолланар өртөөһүнү тэрийбиттэр) эбит буоллахтарына, тыа хаһаайыстыбалаах улуустар нэһилиэктэригэр күүскэ туруорсалларын аахсан, бу үлэни быйылгыттан олохтоох салайыныы уорганнарыгар биэрбиттэр. Маныаха, биллэн турар, эппиэтинэһи тустаах нэһилиэк баһылыга сүгэр.

“Нэһилиэк аайы ойуур фондатыгар киирэр сир баар, ол — тыа хаһаайыстыбатыгар туһаныллар сиргэ киллэриллибэтэх эбэтэр сылгы базатын сирэ, ойуур саҕата эбэтэр ырааһыйа буолуон сөп, — диир Дьулустаан Иванович. – Хамыыһыйа быһаарыытынан, Тыа хаһаайыстыбатын уонна ас-үөл бэлиитикэтин министиэристибэтэ ыам ыйын 1 күнүгэр диэри ойуур фондатыгар киирэр сири бас билээччилэр уонна туһанааччылар реестрдэрин тиксэриэхтээх. Ити гынан баран, билиҥҥи туругунан, ойуур фондатыгар өртөөһүнү ыытарга 2-3 улуустан эрэ сайаапка киирдэ. Нэһилиэктэр баһылыктара ордук-хос эппиэтинэһи ылыныахтарын баҕарбаттар быһыылаах…”

Тыа хаһаайыстыбатыгар туһаныллар сири өртөөһүн федеральнай сокуонунан бобуллан турар. Онон сиэттэрэн ходуһа-мэччирэҥ сир өҥүн тупсарар туһуттан өртөөһүнү көҥүллүүргэ туруорсуу сыллата күүһүрэн иһэр. СӨ Ойуур сыһыаннаһыыларыгар департамена бэйэтэ көҕүлээн, быйыл саҕалааһын бэрээдэгинэн уонна дьону-сэргэни эппиэтинэстээх буолууга үөрэтэ таарыйа ойуур фондатыгар киирэр сиргэ өртөөһүнү хонтуруоллаан туран ыыттарарга быһаарда. Дьаһал төһө кэскиллээх буолара — сирдээх киһиттэн саҕалаан баһылыкка тиийэ тутулуктаах. Кинээстэр бартыбыалларын харыһыйаллара бэрдиттэн  эппиэтинэстэн куттанан-куотунан, кирийэн хаалар буоллахтарына, сир өппөтө чуолкай.

Василий НИКИФОРОВ, edersaas.ru

1
0
Telegram @edersaas20

Добавить комментарий