Хаар ууллан, сир-дойду кууран, кыра даҕаны тыалтан сэтэрээн, уот барар куттала күүһүрэн иһэр.
Ситэ умуруоруллубатах кулуһунтан эбэтэр сэтиэнэх оту-маһы көҥүллэтиигэ, эрдэттэн бэлэмэ суох уматыыттан уот туран тыаны сиир, нэһилиэнньэлээх пууннарга кутталы үөскэтэр, үлэ-хамнас эбийиэктэрин былдьыыр. Быһата, биир испиискэ маһын дьалаҕайдык туттууттан улахан хоромньу оҥоһуллар. Арассыыйа Федерациятын бырабыыталыстыбата 2007 с. бэс ыйын 30 күнүгэр бигэргэппит тыаҕа уоттан сэрэхтээх буолуу быраабылаларын 12-с пуунугар олоҕуран, тыа саҕатыгар биитэр ойууртан чугас сирдэргэ кур оту-маһы уматыы бобуллар. Бу быраабылалары кэстэххэ, административнай быраабылалары кэһии туһунан федеральнай Кодекска сөп түбэһиннэрэн, ыстарааптыыр миэрэ туттуллар: биирдиилээн дьоҥҥо 3-4 тыһыынча солкуобай, дуоһунастаах дьоҥҥо 15-25 тыһыынча солкуобай, тэрилтэлэргэ 150 – 200 тыһыынча солкуобай.
Саха Өрөспүүбүлүкэтин экологияҕа, айылҕаны туһаныыга уонна ойуур хаһаайыстыбатыгар министиэристибэтэ көҥүлэ суох өртөөһүнү, бөҕү-саҕы уматыыны итиэннэ киһи буруйуттан баһаар барыытын суох оҥорор туһуттан, тыаҕа уоттан сэрэхтээх буолуу быраабылаларын кэһии түбэлтэлэрин булууга, бохсууга итиэннэ сэрэтиигэ үлэлиир суһал бөлөхтөрү тэрийдэ. Онон, бары лесничестволарга эриэйдэлэр тиһигин быспакка ыытыллаллар.
Коронавируһунан сибээстээн киллэриллибит хааччахтыыр дьаһаллар чэрчилэринэн Маай өрөбүллэригэр тыаҕа тахсыы бобулунна. Экология, айылҕаны туһаныы уонна ойуур хаһаайыстыбатын министиэристибэтэ ону тутуһарга итиэннэ уоттан сэрэхтээх буоларга, баай хара тыаны харыстыырга ыҥырар.
Ханна эмит уот турбутун биллэххэ, буруо тахсарын көрдөххө, эрэгийиэннээҕи диспетчерскай сулууспа быһа сибээһигэр 8(4112)44-74-76 уонна 8(800)100-94-00 төлөпүөн нүөмэрдэринэн биллэрэргэ көрдөһөр диэн министиэристибэ пресс-сулууспата өссө төгүл иһитиннэрэр.
Раиса Сибирякова, «Саха сирэ» хаһыат, edersaas.ru
Хаартыска — интэриниэттэн.