Уус Алдан улууһун Тулуна нэһиэгиттэн төрүттээх, «Эдэр саас» таһаарыы уонна «Мин-Инженербин» тэриллии ыытар «Саха ыччатын — промышленноска» экспедиция кыттыылааҕа Эрхаан Бысыин алтынньы 7-8 күннэригэр Москва куоракка ыытыллыбыт спортивнай туризмҥа Арассыыйа чөмпүйүөнэ буолла. Манна биир сууккалаах күрэхтэһиигэ уопсайа 136 спортсмен кыттыыны ылла. Эрхаан 109 км нөҥүөлээн, 39 пууну булан, 390 баалы толору ылан, бастыҥ көрдөрүүлэнэн, спортивнай туризм көрүҥҥэ сахалартан бастакынан Арассыыйа спордун маастарын нуорматын толордо.
Биллэн турар, спортивнай туризмҥа чэпчэки суол суох. Хаартанан уонна куомпаһынан сирдэтинэн, сыырдарынан уонна тыанан түүннэри биир суукка тохтоло суох сүүрэн, үс үрэҕи туораан үрдүк ситиһиигэ тигистэ! Эрхааҥҥа өссө да элбэх ситиһиилэри баҕарабыт.
Николай Попов, «Саха сирэ» хаһыат, edersaas.ru