Сайтпытыгар бу дьыала туһунан быйыл кулун тутар 1 күнүгэр «Эрин саанан ытан өлөрбүт» диэн иһитиннэриигэ суруйбуппут. Дьыала номнуо суукка көрүллэн, бириигэбэр тахсыбыт.
edersaas.ru
Ол курдук, суут быһаарбытынан, 2018 сыл олунньу 27 күнүгэр Үөһээ Бүлүү улууһун Сургуулук нэһилиэгэр кэргэнниилэр арыгы иһэ олорон, бурайсан турбуттар. Онуоха ойоҕо 38 саастаах эрин «куттаары» диэн, «ТОЗ-66» сааны уонна ботуруоннары ылан, күүлэҕэ тахсыбыт. Уонна бастаан аан диэки туһаайан ыппыт. Баҕар, эрим дьиэттэн тахсан, бырастыы гынарбар көрдөһүө диэн эрэнэн. Тахсыбатах.
Онтон дьахтар кэтэһэ түһэн баран, эрэ тахсыбатаҕын иһин, дьиэҕэ киирэн, ороҥҥо сытар кэргэнигэр чугаһаан, сүрэххэ кыҥаан баран, биирдэ ытан, миэстэтигэр өлөрбүт. Уонна туох алдьархайы оҥорбутун эдьиийигэр кэпсээбит. Полицияны эдьиийэ ыҥырбыт.
Өлөрүөхсүт дьахтар уһун сыллар усталарыгар эрин кытта бииргэ бултаһар буолан, саанан сатаан туттар, бэргэнник ыта үөрүйэх эбит.
Суут кинини киһини соруйан өлөрүүгэ буруйдааҕынан билинэн, 6 сылга уопсай эрэсиимнээх холуонньаҕа көҥүлүн быһарга уурбут.
Бириигэбэр сокуоннай күүһүгэр киирэ илик.
Бу туһунан СӨ Борокуратууратын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн