Ойуур баһаарыттан сэрэхтээх буолууга эриэйдэлэр саҕаланыахтара
Бытарҕан тымныылаах уһун кыһын ааһан, хаар ууллан, ойуур баһаарыттан сэрэхтээх буолууга патруллуур-эриэйдэлиир дьаһаллар саҕаланыахтара.
edersaas.ru
Коронавирус дьаҥынан сибээстээн хааччахтыыр дьаһаллар киллэриллибиттэринэн, Экология, айылҕаны туһаныы уонна ойуур хаһаайыстыбатын министиэристибэтин судаарыстыбаннай иниспиэктэрдэригэр Арассыыйа Федерациятын Администратвинай кэһиилэр тустарынан кодексатын (КоАП) 20.6.1. ыстатыйаларыгар сөп түбэһиннэрэн, ойуур харыстабылыгар, баһаартан сэрэхтээх буолууга, бултааһын быраабылаларыгар, ураты харыстанар территорияларга, уу эбийиэктэригэр сыһыаннаан административнай кэһиилэр боротокуолларын толорор боломуочуйа бэрилиннэ. Бу ыстатыйа 99 №-дээх федеральнай сокуонунан быйыл муус устар 1 күнүттэн киллэриллибитэ.
Муҥутуур бэлэмнээх буолуу эрэсиимигэр олорор территорияҕа бу быраабылалары кэһии эппиэккэ тардыллар. Онуоха административнай ыстараап кээмэйэ маннык: гражданнарга – 30 тыһ. солк. диэри, дуоһунастаах дьоҥҥо – 10-50 тыһ. солк., юридическай сирэй буолбакка сылдьан урбаанынан дьарыктанааччыга – 30-50 тыһ. солк., юридическай сирэйгэ — 100-300 тыһ. солк.
Муҥутуур бэлэмнээх буолуу биитэр ыксаллаах быһыы-майгы эрэсиимигэр киллэриллибит территорияҕа гражданнар уонна тэрилтэлэр хайдах туттан-хаптан, дьаһанан олоруохтаахтарын туһунан быраабыла Арассыыйа Федерациятын Бырабыыталыстыбатын муус устар 2 күнүгэр таһаарбыт 417 №-дэх Уурааҕар бигэргэтиллибитэ. Онон, Экология, айылҕаны туһаныы уонна ойуур хаһаайыстыбатын министиэристибэтэ Саха сирин олохтоохторун изолоцияланыы эрэсиимин тутуһарга, айылҕаҕа, тыаҕа тахсартан туттунарга ыҥырар.
Раиса Сибирякова, «Саха сирэ» хаһыат, edersaas.ru