Бэҕэһээ, кулун тутар 25 күнүгэр, номнуо үһүс сылын ыытыллар Хакатон ыччат ортотугар IT- бырайыактарга күрэх түмүгэ билиннэ.
Бастакы миэстэни Саха политехническай гимназия 10 кылааһын үөрэнээччитэ Эрхан Заровняев хамаандата ылла.
—Бу куонкуруска кыттыахха диэн оскуолабыт педагог-тэрийээччитэ Наталия Николаевна эппитэ. Мин түөрт киһилээх хамаанда хомуйбутум: Романова Сахайаана, Попова Настя, Ларионова Лена буолан бырайыагы оҥордубут. Уонна 3D-визуализацияны оҥорорго эмиэ биһиги оскуолабыт үөрэнээччитэ Саша Копырин көмөлөспүтэ.
Хамаандабытын «Шанс» диэн ааттаабыппыт. «Тыыннаах Дьокуускай» диэн бырайыакпыт бастаабытыттан үөрэ сылдьабыт. Биһиэхэ «Арассыыйа – мин устуоруйам» диэн түмэл кэннигэр баар киэҥ ырааһыйаҕа миэстэни биэрбиттэрэ. Бу миэстэҕэ биһиги атыы-кииннээх, сынньанар сирдээх Этно-түмэл оҥоруохха сөп диэн бырайыакпытын көмүскээтибит. Бастатан туран, куталаах сиргэ кумах, буор кутан мастары олордуохха сөп диэн дакаастаатыбыт. Кыһынын манна сырылыыр, хаҥкылыыр сирдэри оҥоруохха сөп.
Күрэхтэһии тэрийээччилэрэ, оскуола оҕолоро маннык таһымнаах бырайыагы оҥоруохтарын сөп эбит диэн соһуйдулар быһыылаах. Бу бырайыакпытын олоххо киллэрэргэ инвестордары көрдьүүбүт, – диэн Эрхаан үллэһиннэ.
Виктория Бястинова, edersaas.ru, «Саха сирэ» хаһыат.
Хаартыска Эрхан Заровняев архыыба.