Эргиэн уонна социальнай өҥө тэрилтэлэрэ санитарнай дьаһаллары тутуһуохтаахтар

Өрөспүүбүлүкэҕэ коронавирус дьаҥын бохсорго ылыллыбыт хааччахтыыр дьаһаллар бүгүҥҥү күнтэн түһүмэхтэринэн сымнатылыннылар.

edersaas.ru.

Онон, киинтэн ыраах сытар, саас-сайын суоллара быстар улуустартан ураты бары улуустарга эргиэн уонна олох-дьаһах өҥөтүн хааччыйар тэрилтэлэргэ санитарнай-сэрэтэр дьаһаллары толору тутуһар кытаанахтык ирдэнэр. Маҕаһыыннар атыылааччылара, аптекалар, уопсастыбаннай аһылык, социальнай өҥөнү оҥорор  тэрилтэлэр үлэһиттэрэ медицинскэй маасканы, бэрчээккини хайаан да кэтиэх итиэннэ ирдэниллэр тэйиччини тутуһуох, тэрилтэлэригэр дезинфекциялыыр үлэни тиһигин быспакка ыытыах тустаахтар. Оттон атыылаһааччылар уонна социальнай өҥөнү оҥорторор дьоннор тус бэйэлэригэр куттал суох буолуутун хааччынан, эмиэ медицинскэй маасканы, бэрчээккэни хайаан да кэтиэхтээхтэр, ирдэнэр тэйиччини тутуһуохтаахтар. Тэрилтэлэр салайааччылара үлэһиттэрин харыстанар тэриллэринэн хааччыйыахтаахтар. Тэрилтэҕэ үлэһит биитэр килийиэн ыарыыга хаптарар түбэлтэтигэр, тэрилтэ үлэтин тохтотуохтаах.

Санитарнай-эпидемическэй быраабылалары кэспит дьон Арассыыйа Федерациятын Административнай эппиэтинэс туһунан кодексатын 20.6.1 ыстатыйанан административнай эппиэтинэскэ тардыллаллар. Онуоха ыстараап маннык: гражданнарга 1 – 30 тыһ. солк.; дуоһунастаах сирэйдэргэ 10 – 50 тыһ. солк.; юридическэй сирэй буолбатах биирдэм урбаанньыкка 30—50 тыһ. солк.; юридическэй сирэйдэргэ 100—300 тыһ. солк. диэн Ил Дархан уонна Бырабыыталыстыба пресс-сулууспата иһитиннэрэр.

Раиса Сибирякова, «Саха сирэ» хаһыат, edersaas.ru