Абыйга уонна Усуйаанаҕа эргиэн-логистика кииннэрэ тутуллан үлэ-хамнас салҕанар.
Онуоха 2019 сылы кытта тэҥнээтэххэ, сорох ас-үөл сыаната 20-25 бырыһыан намтаабыта бэлиэтэнэр. Кииннэргэ оҕуруот аһын хаһаанар сирдээхтэр, тоҥорор камералардаахтар, сылаас ыскылааттаахтар, атыылыыр сирдээхтэр.
Үлэни-хамнаһы сайыннаран иһэр туһуттан, эргиэн-логистика кииннэрин баазаларыгар эт, балык уонна сир аһын соҕотуопкатын пууннарын аһары былаанныыллар. Бу туһунан «Якутопторг» хампаанньа дириэктэрин солбуйааччы Сайдам Степанов СИА иһитиннэрбит. Үлэ хааччыйыы саҥа систиэмэтигэр көһүү иитинэн ыытыллар. Манна даҕатан эттэххэ, Ил Дархан Айсен Николаев социальнай ситимнэринэн быһа сибээскэ 2024 сылга диэри бары арктическай улуустарга эргиэн-логистика кииннэрэ аһыллалларын туһунан этэн турар. Арктикаҕа ыскылааттар олус эргэрбиттэр, 1960-1970 сыллардааҕы тутуулар диэн быһаараллар.