Бүгүҥҥүттэн Дьокуускайдааҕы атыы-эргиэн экэнэмиичэскэй кэллиэһигэр П.А.Ойуунускай төрөөбүтэ 125 сылыгар аналлаах “Инники идэҕэ хардыы” эдэр чинчийээччилэр өрөспүүбүлүкэтээҕи XII форумнара саҕаланна. Тэрээһиҥҥэ, уопсайа, 40-тан тахса үөрэх тэрилтэтэ кытынна.
edersaas.ru
Тэрийээччилэр бэлиэтииллэринэн, быйылгы форум киэҥ ис хоһоонноох ыытыллар. Ол курдук, араас хайысхаларынан 14 сиэксийэнэн эдэр чинчийээччилэр куонкурустара, “Олоҥхо дойдута” эдэр модельердар уонна дизайнердар бэстибээллэрэ, инженердэр быыстапкалара, хамаанданан дьыалабыай оонньуу, П.А.Ойуунускай төрөөбүтэ 125 сылыгар аналлаах лиэксийэлэр, театральнай көрдөрүү, сэминээрдэр, “төгүрүк остуол” буолаллар. “Быйыл оскуола оҕолоруттан саҕалаан, улахан дьоҥҥо тиийэ араас көрүҥнэргэ маастар-кылаастар ыытыллаллар. Устудьуоннар Сунтаардааҕы технологическай кэллиэстэн, Эдьигээннээҕи элбэх профиллаах лиссиэйтэн тиийэ кэллилэр. Эдэр чинчийээччилэр мэктиэ ылан салгыы Бүтүн Арассыыйатааҕы “Шаг в будущее”, “Открой в себе ученого” кэмпириэнсиэлэргэ кыттыахтара”, — диэн Анал үөрэҕи сайыннарар институт мэтэдииһэ Людмила Мигалкина билиһиннэрэр.
“Киһи доруобуйата” сиэксиэйэҕэ орто анал үөрэх тэрилтэлэриттэн 16 устудьуон кытынна. ХИФУ медицинэҕэ институтун дассыана Сардаана Алексеева: “Мин көрүүбэр, талан ылбыт быһаччы идэлэрэ буоларын быһыытынан, ордук Дьокуускайдааҕы медицинэ кэллиэһин устудьуоннара кытыннылар. “Үөһээ Бүлүүтээҕи тиэхиньикум устудьуоннарын мэйиитин кыаҕа” диэн тиэмэлээх Никита Николаев үлэтин сэҥээрдибит. Кини өйгө тутар дьоҕуру сайыннарарга бэйэтэ тест оҥорбут. Ону быраактаҕа туһаналлар эбит. Ону тэҥэ, Елена Николаева “Эндомическай зоб” диэн тиэмэҕэ үлэтин биһирээтибит. Елена ууга, аска йод састаабын чинчийбит. Ол түмүгэр олохтоох эккэ, чуолаан таба этигэр, йод элбэҕин быһаарбыт. Оттон Дьокуускайдааҕы индустриальнай-педагогическай кэллиэс устудьуона Туйаара Плотникова доруобуйаларынан хааччахтаах оҕолорго аналлаах таҥаһы толкуйдаабыт. Көннөрү таҥастан уратыта диэн, нууччалыы эттэххэ, “универсальнай”, хлопоктан тигиллэр, араас сиринэн тардыы тимэхтэрдээх уонна сахалыы истииллээх”, — диэн бэлиэтээтэ.
Түөрт этээс тухары араас маастар-кылаастар буоллулар. Манна көмүс оҥоһуктары ыраастыырга, билэни тигэргэ, гитараҕа оонньуурга, бөрөчүөскэ оҥосторго, доруоһалаах тиэстэттэн ас буһарарга, тууйаһы тигэргэ, чарапчыны, о.д.а. оҥорорго тиийэ үөрэттилэр. Холобура, Бүлүүтээҕи педагогическай кэллиэс алын кылаас учуутала идэтигэр үөрэнэр 1 куурус устудьуона Полина Николаева оҕуруонан өссө оскуолаҕа үөрэнэр сылларыттан умсугуйан дьарыктанар эбит. Ол курдук, улахан кылаастарга үөрэнэ сылдьан букатын 72 тыһ. солк. киллэрбит. Маастар-кылааска станогунан билэни хайдах тиһэри көрдөрдө. Атыыга диэн билэлэрин уонна суумка илдьэ кэлбит. Мааны бэйэлээх суумката атыыга номнуо барбыт. Оттон тустаах кэллиэс 3 кууруһун устудьуона Екатерина Майорова баттаҕы оҥостууга маастар-кылаас көрдөрдө, сүбэ-ама биэрдэ.
Людмила ПОПОВА, “Саха сирэ” хаһыат, edersaas.ru
Ольга СТАРОСТИНА (СИА), Людмила ПОПОВА хаартыскаҕа түһэриилэрэ.