Дьокуускай куорат бөҕүн харайар полигону тутуу туһунан кэпсэтии уҕараабат. Эбиитин, дьон талбыт сиригэр бөҕү бэрээдэгэ суох тоҕоро, сыбаалкаттан ордук сайыҥҥы кэмҥэ бөх-сах умайбыт буруота кэлэрэ, «таалы кырыылыыр».
«Экология» национальнай бырайыак хайдах толоруллан иһэрин туһунан соторутааҕыта эрэ мунньах буолбута. Ил Дархан чуо «Ыраас дойду» бырайыакка үлэ болдьоҕо уһаан иһэрин сэмэлээбитэ. Бүлүүлүүр аартык 9 килэмиэтиригэр баар бөх тоҕор сири (сыбаалканы) рекультивациялааһын саҕаламмакка турарын ыйан туран, боппуруоһу быһаарарга быстах да кэмнээх схеманы тобуларга соруйбута.
Оттон алтынньы 7 күнүгэр, СӨ ОДьКХ уонна энергетикэ миниистирэ Дмитрий Садовников Дьокуускай куорат полигонугар уонна саҥа полигон тутуллуохтаах сиригэр, Бүлүүлүүр аартык 27 килэмиэтиригэр, тиийэ сырытта. Манна биэдэмистибэлэр икки ардыларынааҕы оробуочай бөлөх кыттыылаахтара, саҥа полигон тутуллан үлэҕэ киириэр диэри тобоҕу мунньар быстах кэмнээх былаһаакканы тутары эбэтэр инсинератор, ол эбэтэр бөҕү суох оҥорор, утилизациялыыр гына оҥорор ордук буолуох этэ диэн санааларын үллэһиннилэр. Оттон саҥа полигон тутуллуохтаах сиригэр, Бүлүүлүүр аартык 27 килэмиэтиригэр, билиҥҥитэ инженернэй чинчийиилэр ыытыллаллар. Үлэни «Стройэкспертиза» научнай-технологическай киин» ХЭУо толорор.
Полигон боппуруоһун быһаарыы мунньаҕар СӨ Баайга-дуолга уонна сир сыһыаннаһыыларыгар министиэристибэ, СӨ Росприроднадзор, Роспотребнадзора управлениелара, Саха сиригэр экологическай кэтээн көрүү судаарыстыбаннай кэмитиэтэ, СӨ ОдЬКх» ГУТ, Дьокуускай куорат дьаһалтата, «СЭГХ» МКУ, «Жилкомсервис» МУТ, «Якутскэкосети» ХЭУо кытыннылар.