Эһиил биһиги өрөспүүбүлүкэбитигэр кытаанах бөҕү-саҕы хомуйуунан дьарыктанар оператор тэриллэн, бу дьыалаҕа улахан хамсааһын тахсыахтаах. Бу хамсааһыны өйөөн, Чурапчы улууһун Дириҥ орто агро-оскуолатын онус кылааһын үөрэнээччилэрэ быраҕыллыбыт көлүөһэлэри хомуйан, бөһүөлэккэ дьон сынньанар сирин оҥорор санаалаахтар.
Бу туһунан кинилэр нэһилиэк күнүгэр анаммыт “Нэһилиэгим сайдыыта – мин илиибэр” диэн тиэмэлээх “төгүрүк остуолга” билиһиннэрдилэр. Бырайыактаах онус кылаастар үлэлэрин саҕалыахтарын иннинэ, бөһүөлэккэ баар түөлбэлэри ырытан көрбүттэр. Уонна онно дьон сынньанар сирин ханан туруоруохха сөбүн олохтоохтору кытары сүбэлэһэн талбыттар.
Түөлбэлэринэн алта бырайыагы көмүскээтилэр. Биир бырайыактарыгар быраҕыллыбыт көлүөһэлэртэн араас оҥоһугу оҥорон былаһаакканы киэргэтиэххэ сөбүн туһунан кэпсээтилэр. Билигин кырдьык, хас тиэргэн аайы туһаттан тахсыбыт тиэхиньикэ хара баһаам. Ону иккис тыыннаан туһаҕа таһаарыы хайҕабыллаах дьыала. Иккиһинэн, бу хамсааһын нэһилиэги тупсарыыга, ыраастааһыҥҥа төһүү күүс буолар. Бу маны ыччат саҕалаабыта, көҕүлээбитэ олус үчүгэй.
“Төгүрүк остуолга” барыта түөрт кылаас бырайыагын көмүскээтэ. Онус кылаастары таһынан, кыралар күн уотунан барар батареяны туһанан бөһүөлэккэ киирии аарканы, нэһилиэк олоҕун билиһиннэрэр стелланы сырдатыы, тротуарнай билиитэлэринэн дьон хаамар сирин оҥоруу уонна сибэккилэринэн оскуола таһын киэргэтии туһунан кэпсээтилэр.
Манна даҕатан, быйылгы үөрэх дьылыттан Дириҥ оскуолатыгар бизнес-инкубатор диэн тэриллибитин санатан этиэм этэ. Манна оҕолор бырайыактары суруйарга үөрэнэллэрин таһынан, предпринимательствоҕа үөрэниигэ бастакы хардыыларын оҥороллор. Онон “төгүрүк остуолга” Хоптоҕо түмсүүттэн предпринимателлэр кэлэн кыттыыны ылбыттара улахан суолталаах уонна үтүө түмүктэрдээх буолла.
Тэрээһин түмүгэр предпринимателлэр бу кэпсэммит бырайыактары олоххо киллэриигэ көмөлөһөр бигэ тылларын биэрдилэр. Оттон онус кылаастар бырайыактарын кэҥэтэн бүтүн нэһилиэги хабар улахан бырайыак оҥорон өрөспүүбүлүкэҕэ кыттар былааннаннылар. Онон Нэһилиэнньэлээх пууннары тупсаран оҥоруу сыла улахан дьоҥҥо эрэ буолбакка, оскуола оҕолоругар эмиэ ураты суолталанна.
“Бу маннык бары, эдэрдэр-кырдьаҕастар, “төгүрүк остуол” тула олорорбут курдук, бииргэ түмсэн сырыттахпытына, улахан хамсааһын тахсыаҕа, үлэ түмүктээх буолуоҕа”, — диэн Павел Пинигин эппитинии, нэһилиэк эдэриттэн эмэнигэр тиийэ биир суолу тутустаҕына сайдыылаах буолуоҕа.
Аграфена КУЗЬМИНА.