Муус устар 27 күнэ — Саха Өрөспүүбүлүкэтигэр ураты күн. Бу күн 97 сыл анараа өттүгэр Саха Аптаныамынай Сэбиэскэй Сэссэлистиичэскэй Өрөспүүбүлүкэтэ олохтоммута, оттон 27 сыллааҕыта Саха Өрөспүүбүлүкэтин Конституцията (Төрүт Сокуона) ылыллыбыта.
Саха Өрөспүүбүлүкэтин күнэ 1999 сыллаахтан национальнай бырааһынньык быһыытынан далааһыннаахтык бэлиэтэнэр: бу күн бүтүн Саха сирин үрдүнэн, Дьокуускайга, куораттарга, улуустар кииннэригэр, бырамыысаланнай бөһүөлэктэргэ, нэһилиэктэргэ бырааһынньыктааҕы дьаһаллар ыытыллаллар.
Бүгүн күнүс 12 чаастан Дьокуускай куорат болуоссаттарыгар судаарыстыбаннаһы олохтоспут саха чулуу дьонугар М.К.Аммосов, П.А. Ойуунускай, И.Н.Барахов, А.Е.Кулаковскай, С.В.Васильев, В.В.Никифоров-Күлүмнүүр өйдөбүнньүктэригэр, М.К.Аммосов мусуой-дьиэтигэр М.К.Аммосов бүүһүгэр, С.М.Аржаков өйдөбүнньүк дуоскатыгар Саха Өрөспүүбүлүкэтин салайааччылара, норуот дьокутааттара, СӨ бырабыыталыстыбатын чилиэннэрэ, уопсастыбаннас бэрэстэбиитэллэрэ кыттыылаах тыыннаах сибэккилэри ууруу сиэрэ-туома буолла.
— Саха Өрөспүүбүлүкэтин төрүттээбит чулуу дьоммут кэккэлэригэр Степан Васильев ураты миэстэни ылар, — диэтэ Степан Васильев пааматынньыгар сибэкки ууруутугар Бырабыыталыстыба Бэрэссэдээтэлин солбуйааччы Алексей Стручков. — Кини дойду судаарыстыбаннай былааһын үрдүкү таһымыгар үлэлээбит биир тарбахха баттанар киһибит. Ол курдук, Саха сиригэр идэлээх сойуус итиэннэ хомсомуол хамсааһыннарын төрүттээбитэ. Сиртэн хостонор баайы туһаҕа таһаарар бырамыысаланнас сайдыытыгар сырата кыайан кэмнэммэт. Чуолаан Степан Васильев бүтүн Сойуустааҕы “Якутзолото” тириэһи олохтоспута, Сэбиэскэй Сойууска ыарахан промышленноһы төрүттээһиҥҥэ үлэлэспитэ.
Саха интеллигенциятын чулуу бэрэстэбиитэлэ, уһулуччулаах уопсастыбаннай уонна бэлитиичэскэй диэйэтэл, сырдатааччы Василий Никифоров-Күлүмнүүр пааматынньыгар сибэкки дьөрбөтүн ууруу сиэригэр Ил Түмэн бэрэссээдэтэлин бастакы солбуйааччы Александр Жирков маннык эттэ:
— Күлүмнүүр сырдык аата тилиннэриллиэҕиттэн XIX үйэ бүтүүтүгэр, XX үйэ саҕаланыытыгар саха норуотун хараҕын аспыт, кинин сырдыкка тардыбыт бастакы көлүөнэ үөрэхтээхтэр үтүө ааттара эмиэ норуоттарыгар эргилиннэ. Бүгүн биһиги кинилэр бэрт кылгас кэм иһигэр үөрэҕи, науканы, култуураны, судаарыстыбаннаһы, уопсастыбаннай сыһыаннаһыылары сайыннарыыга элбэҕи даҕаны оҥорбуттар эбит сөҕө итиэннэ киэн тутта саныыбыт.
Күнүс 15 чаастан Суорун Омоллоон аатынан Опера уонна балет судаарыстыбаннай тыйаатырыгар Саха Өрөспүүбүлүкэтин күнүгэр итиэннэ Ил Түмэн 25 сылыгар анаммыт уопсастыбаннас үөрүүлээх мунньаҕа буола турар.
Раиса Сибирякова, «Саха сирэ» хаһыат, edersaas.ru
Хаартыскаларга ЯСИА түһэриитэ.