Ырысыап ылыах иннинэ харахха тоҕо хааппыла куталларый?

Бөлөххө киир:

Мэдиссиинэ национальнай киинин — Өрөспүүбүлүкэтээҕи 1 №-дээх балыыһа исписэлиистэрэ ааҕааччылар ыйытыыларыгар хоруйдууллар.

edersaas.ru

-Эһиги кииҥҥитигэр сурдологка уонна логопедка хайдах көрдөрүнүөххэ сөбүй?
— Олорор сиргинэн поликлиникаҥ отоларинголог эбэтэр педиатр быраастара туһаайар сурук (направление) биэрдэхтэринэ, Киин сурдолог уонна логопед быраастара көрөллөр. Киин үлэһиттэрэ электроннай почтанан, Vipnet ханаалынан, Биир кэлим регистратура төлөпүөнүнэн эрдэттэн суруйаллар.

-Мин оҕобор ачыкы анаабыттара да, кэтиэн баҕарбат. Ачыкы кэтэрин хайдах ситиһэбит?
-Быраас биэрбит эрэсиэбэ оҕо рефракциятыгар төһө сөп түбэһэрин бэрэбиэркэлиир наада. Эбэтэр, баҕар, оҕоҥ бэйэтин кэлэктиибигэр ачыкы кэтэриттэн кыбыстара буолуо. Оччотугар оҕоҕун кытары аһаҕастык кэпсэтэриҥ уонна ачыкытын иитин бэйэтэ талара ордук.

-Быраастар киһиэхэ ачыкыны аныылларыгар тоҕо хас да күн иннинэ харахха хааппыланы куталларый? Ити булгуччулаах дуо?
-Оҕоҕо ачыкыны аныырга рефракцияны (харах оптическай уратытын) чопчулуохха наада. Ити өр кэмҥэ тустаах эмтээх препараттары хараҕар таммалаттахха эрэ кыаллар.

-Мин оҕом күнү быһа көмпүүтэргэ олорон дьарыктанар. Хараҕа мөлтөөбөтүн, ыалдьыбатын туһугар тугу гыныахха сөбүй?
-Харах тохтоло суох ноҕуруускаланара харах туругар эппиэттиир былчыҥнар сиэри таһынан күүрэллэригэр тириэрдэр. Оҕо ырааҕы көрбөт туруктамматын туһугар харах ноҕуруускатын кэтээн көрөр, үлэни уонна сынньалаҥы дьүөрэлиир наада. Үлэ кэнниттэн 10-15 мүнүүтэ түннүгүнэн саамай ыраах сытар сири одуулуур, салгыҥҥа сылдьан күүлэйдиир уонна хамсаныылаах оонньуулары оонньуур олус туһалаах. Оттон оҕо ырааҕы көрөрө мөлтөөбүтэ билиннэҕинэ эбэтэр харахтарын симиличчи көрөр буоллаҕына, окулист-бырааска көрдөрүҥ.

 Надежда ЕГОРОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0