РФ Бырабыыталыстыбата эрэсиэбинэн бэриллэр эмтэри онлайн-атыылааһыны (боруобалааһын) бэрээдэктиир сокуон барылын Судаарыстыбаннай Дуумаҕа киллэрэр былааннаах. Боруобалааһын 2023 сыл кулун тутар 1 күнүттэн 2026 сыл кулун тутар 1 күнүгэр диэри Москваҕа, Москва уонна Белгород уобаластарыгар ыытыллыахтаах.
edersaas.ru
Арассыыйа Доруобуйа харыстабылыгар министиэристибэтин штаты таһынан гериатр-исписэлииһэ Ольга Ткачева боруобалааһыны киллэриигэ санаатын маннык үллэһиннэ:
— Бу бырайыак уонна эми-тому онлайн атыылааһын чуолаан дьиэлэриттэн тахсан аптыакаҕа тиийэр кыахтара суох кырдьаҕас дьоҥҥо табыгастаах буолуоҕа. Ону сэргэ, кырдьаҕастар олус элбэх ааһан-араҕан биэрбэт ыарыылаах буолуохтарын сөп. Онуоха кинилэр эмтэнии былаанын чопчу тутуһуохтаахтар, эмтэрэ куруук кэмигэр баар буолуохтаах. Мин санаабар, кырдьаҕастарга, ааһан-араҕан биэрбэт ыарыылаах дьоҥҥо эмтэрин-томторун онлайн атыылаһар кыахтаналлара олус суолталаах. Тоҕо диэтэххэ, эмтэнии көдьүүһэ биллэ эбиллиэҕэ. Кырдьаҕас дьону кытары үлэлиир быраастар, биллэн турар, бу саҥа киллэриини үөрэ ылыныахтара.
х х х
Санатан эттэххэ, 2022 сыл тохсунньу 1 күнүттэн РФ Доруобуйа харыстабылын министиэристибэтин көҕүлээһининэн, сокуон барылыгар кэккэ уларыйыы киирэн, аптыаката суох нэһилиэнньэлэр биэлсэр-акушер пууннарыгар эмп-том атыыланара көҥүллэнэн турар. Итинэн сибээстээн, тыа сирин дьонун эминэн-томунан хааччыйыы табыгастаах буолбута.
Надежда ЕГОРОВА, «Саха сирэ», edersaas.ru