Саха сирин баһаарынайдара бэйэлэрин истэригэр «Өлбөт үйэлээх полк» бырайыагы саҕалаатылар.
Хаҥалас улууһун Көрдөм нэһилиэгин олохтооҕо, «Кыһыл сулус» уордьан кавалера, Аҕа дойду сэриитин l истиэпэннээх, «Албан аат» ll истиэпэннээх уордьаннарын хаһаайына Аҕа дойду Улуу сэрии кыттыылааҕа Еремей Михайлович Скрябин 1918 сыллаахха биэс оҕолоох ыалга улахан уолунан Дьөппөн нэһилиэгэр төрөөбүтэ. Кини 1941 сыл от ыйын 30 күнүгэр фроҥҥа ыҥырыллан төрөөбүт дойдутун көмүскүү айаҥҥа туруммута.
Сэриигэ уһаарыллыыта Белоруссия сиригэр-уотугар Гомель уонна Могилев куораттарга уоттаах сэрииттэн саҕаламмыта. Сэбиэскэй сойуус дьоруойа Григорий Белов хамаандатынан, 16-с Черниговскай гвардейскай орденоноснай кавалерийскай дивизияны кытта Берлиҥҥэ түмүктүүр этэрээтигэр кыттыбыта. Бу гвардияҕа рядовой кавалер Еремей Скрябин дивизиятын 78 Сэбиэскэй сойуус дьоруойун, 8 толору уордьан кавалерын, олор истэригэр Сойуус Дьоруойа, биир дойдулааҕа И.П. Папышевы ахтара.
Еремей Михайлович сэрии кэнниттэн этэҥҥэ эргиллэн кэлэн, Нөмүгү уонна Бастакы Дьөппөн нэһилиэктэригэр сэбиэтинэн талыллыбыта. Кини бэйэтин ахтыытыгар холкуоска үлэлии сырыттаҕына фроҥҥа ыҥырыы бэбиэскэтэ кэлбит күнүн саныыра. Ону таһынан, И.В.Сталин Черниговскай дивизияҕа махталын туһунан киэн тутта, астына кэпсиирэ.
1985 с 7-с Бранденбурскай гвардейскай кавалерийскай куорпус сэрии бэтэрээннэрин көрсүһүүтүгэр Москва куоракка Улуу Кыайыы 40 сылын бэлиэтии тиийбитэ. Аҕа дойду сэриитин l истиэпэннээх уонна ll истиэпэннээх «Албан аат» уордьаннарыгар тиксибитэ.
Еремей Скрябин кэргэнинээн биэс уол, икки кыыс оҕолору төрөтөн, улаатыннаран таһаарбыттара. Билигин кини 15 сиэн уонна 26 хос сиэннэрин сүрэхтэригэр үтүө холобур, киэн туттуу буолан сылдьар.
Ульяна Захарова, edersaas.ru