Соторутааҕыта Хабаровскайга «Уһук Илин гектарыгар» анаммыт эрэгийиэннэр икки ардыларынааҕы «төгүрүк остуолга» Саха Өрөспүүбүлүкэтиттэн Баайы-дуолу бас билиигэ уонна сир сыһыаннаһыытыгар министиэристибэ департаменын салайааччыны солбуйааччы Руслан Винокуров, Тыа хаһаайыстыбатын итиэннэ ас-үөл бэлиититикэтин министиэристибэтин сири оҥорууга, мелиорацияҕа, материальнай-техническэй хааччыйыыга департаменын салайааччыны солбуйааччы Александр Филатов кытыннылар. Саха сиригэр бу сокуонунан туох үлэ ыытылларын, «саха гектарын» итиэннэ «Почта Баан» ПАУо, «Алмазэргиэнбанк» АУо бырайыак чэрчитинэн биэрэр кирэдииттэрин ырычааҕын туһунан иһитиннэриини оҥордулар.
Уһук Илиҥҥэ киһи хапытаалын сайыннарыыга ааҕыныстыба көҕүлээһининэн, сир учаастагын ылбыт дьон «Биһиги – гектардьыттар» диэн саҥа уопсастыбаннай хамсааһыннарын бастакы тэрээһин сийиэһигэр Амма олохтооҕо Роман Филатов сырытта. «Төгүрүк остуол» кэнниттэн сир ылан үлэлэн эрэр дьону кытары көрсүһүү, уопуту атастаһыы итиэннэ этиилэри хомуйуу тэрилиннэ. «Уһук Илин гектар» сокуон чэрчитинэн үлэ саҕаланыаҕыттан, дьон этиитинэн бу сокуоҥҥа кэккэ уларытыылар киллэриллибиттэрэ. Билигин саҥа уларытыылар бакыаттара бэлэмнэнэ сылдьар.
Раиса Сибирякова, Саха сирэ” хаһыат, edersaas.ru.