Эрэгийиэннэргэ спортивнай эбийиэктэри тутууга «Биир ньыгыл Арассыыйа» уопсастыбаннай мониторины саҕалыа.
Партия бу сыалга икки млрд солк. үбү федеральнай бүддьүөттэн көрдөрөрү ситиспитэ.
Аһаҕас тииптээх физкультурнай-чэбдигирдэр комплекстары (ФОКОТ) тутууну «Биир ньыгыл Арассыыйа» дьокутааттарын кытары эрэгийиэн олохтоохторо хонтуруоллуохтара. Үлэни цифровой сервис көмөтүнэн кэтээн көрүөххэ сөп буолуо. Бу туһунан «Биир ньыгыл Арассыыйа» генеральнай сэбиэтин сэкирэтээрин эбээһинэһин быстах кэмҥэ солбуйааччы э.т. Дмитрий Кобылкин иһитиннэрдэ.
«Хас биирдии эбийиэккэ Госдума дьокутааттара, «Биир ньыгыл Арассыыйа» парламеннарын дьокутааттара сыһыарыллыахтара. Эбийиэктэргэ үлэ ыытыллыытын кэтээн көрүөхтэрэ уонна олохтоохторго ону иһитиннэриэхтэрэ. Бастакы уочарат, бэдэрээччити талыыга куонкурус аһаҕас буоларын уонна талыллыбыт тэрилтэ хаачыстыбалаахтык тутарыгар саарбахтааһын суох буоларын хонтуруоллуохтара. Дьокутааттар олохтоохтору кытары тутууну тиийэн көрүөхтэрэ, тахсар кыһалҕаны суһаллык быһаарар инниттэн, бэдэрээччиттэри уонна олохтоох бэйэни салайыныы бэрэстэбиитэллэрин кытары көрсүөхтэрэ«, — диэтэ кини.
Мониторинг табыгастаах буоларын курдук цифровой сервиһи ситэрэллэр, онно ФОКОТ туһунан толору иһитиннэрии баар буолуохтаах. Онон үлэ хаамыытын көрүөхтэрэ. Спортивнай эбийиэктэри туттарыы кэнниттэн, партия үлэтэ салҕанар.
«Оҕо спорда» партбырайыак саҥа эбийиэктэргэ спордунан дьарыктаныы барыларыгар кыаллымтыа буоларын хонтуруоллуо. Ону сэргэ, партия ФОКОТ таһыгар салгыы сирин-уотун тупсарыы боппуруоһугар үлэлэһиэ, ол иһигэр «народнай бюджетирование» механизмнарын туһанан», — диэн бэлиэтээтэ Дмитрий Кобылкин.
Тохсунньу бүтүүтүгэр Бырабыыталыстыба икки млрд солк.үбү ФОКОТ тутууларыгар тыырбыт, федеральнай бүддьүөттэн үбү көрдөрүүнү «Биир ньыгыл Арассыыйа» ситиспит. Партия Кабмины кытары бииргэ дойду сүрүн финансовай докумуонун бэлэмнээһиҥҥэ үлэлэспит. Бу үпкэ-харчыга 100 эбийиэк тутуллуо, итинтэн 43 эбийиэги 2021 сылга киллэриэхтэрэ — куораттарга, тыа сирдэригэр. Аһаҕас тииптээх физкультурнай-чэбдигирдэр комплекстары (ФОКОТ) комплектациялааһыҥҥа күн-дьыл уратыта учуоттанар. Хотугу эрэгийиэннэргэ хоккейдыыр сирдэр, соҕуруу, хаар аҕыйах эбэтэр суоҕун кэриэтэ өттүгэр, спорт сайыҥҥы көрүҥүнэн дьарыктанар баскетбол уонна волейбол былаһааккалара оҥоһуллуохтара. Хайаларыгар да искусственнай бүрүөһүннээх футболлуур сир, сүүрэр дорожка, дьарыктанар тренажердар уонна воркаут-зоналар баар буолуохтара.
Михаил Гуляев, «Оҕо спорда» Саха сиригэр партбырайыак эрэгийиэннээҕи координатора:
—Бэрэсидьиэн туруорбут сыала, 2030 сылга спордунан дьарыктанар дьон ахсаанын элбэтэн 70 бырыһыаҥҥа тиэрдии. Маассабай спорт өйөбүлүгэр — ордук үүнэр көлүөнэни таарыйарга үлэ сүнньэ туһаайыллар.
Быйыл субсидиянан Саха сиригэр биир ФОКОТ тэриллиэҕэ — Дьокуускай куоракка, Р.М.Дмитриев аатынан Олимпийскай эрэллэри бэлэмниир өрөспүүбүлүкэтээҕи училище баазатыгар.
Спорт министиэристибэтэ иһитиннэрбитинэн, субсидияны көрөллөрүгэр сөбүлэһиини түһэрсиигэ үлэ барар, онтон комплексы тэрийээһин испииһэгин РФ Спорка министиэристибэтэ бигэргэтэр. Тутуу сөбүлэһиигэ илии баттаммытын кэнниттэн саҕаланар.