Олунньу 25 күнүттэн суола-ииһэ суох ыраах сытар нэһилиэнньэлээх пууннарга, ыстаадаларга, хотугу станцияларга, артыалларга, о.д.а. сирдэргэ быыбардааһын саҕаланна. Саха сиригэр бэҕэһээҥҥиттэн саҕаланан, Быыбар хамыыһыйатын үлэһиттэрэ ыраах сирдэргэ куоластааһыны ыыта бардылар.
Россия үрдүнэн барыта 35 региоҥҥа маннык куоластааһын ыытыллар. Уһук Илин регионнары таһынан хоту дойдуга үлэлии сылдьар дьон эрдэ быыбардыахтара. Сокуон быһыытынан, хас биирдии киһи ыраах ыстаадаҕа да, хоту акыйааҥҥа да, муораҕа да ханна да сырыттар быыбардыыр бырааптаах. Ол иһин Быыбар хамыыһыйатын үлэһиттэрэ вертолетунан, бураанынан, массыынанан, вездеходунан айаннаан биир-икки да киһилээх метеостанциялары, ыстаадалары, пууннары, артыаллары барыларын кулун тутар 17 күнүгэр диэри кэрийиэхтээхтэр.
Саха сиригэр куоластааһын бэҕэһээҥиттэн саҕаламмыта. Бүгүҥҥү туругунан, Быыбар киин хамыыһыйата иһитиннэрбитинэн, Өймөкөөҥҥө уонна Кэбээйигэ куоластаатылар. Өймөкөөҥҥө 187 киһи быыбардаата. Бу маннык куоластааһын барыта 29 улууска ыытыллыахтаах. Сүрүннээн табаһыттар, сылгыһыттар, көмүс, гаас, ньиэп хостооһунугар сылдьар дьон, геологтар, метеостанция үлэһиттэрэ, булчуттар, балыксыттар хабыллаллар.
Оттон тас дойдуга сылдьар дьоҥҥо эрдэ куоластааһын кулун тутар 2 күнүттэн саҕаланыаҕа.
Аграфена КУЗЬМИНА, «Саха сирэ» хаһыат, edersaas.ru