Дьокуускай куорат 101-с №-дээх быыбардыыр учаастагар РФ бэрэсидьиэнигэр хандьытааттарга куоластааһын үгэннээн бара турар. “Биһиги учаастакпыт быыбардааччылара мэлдьи көхтөөхтүк кытталлар, — диир учаастак хамыыһыйатын бэрэссэдээтэлэ Туйаара Андреева, — Билиҥҥи туругунан (күнүскү чэй саҕана), 2,5 тыһ. быыбардааччыттан 1150 кэриҥэ киһи, бэлиэр, куоластаата”.
Ону туоһулуурдуу Оҕо айымньытын дыбарыаһын тэлгэһэтигэр массыына толору. Дьиҥэр, 101-с №-дээх учаастак Дьокуускай биир киин түөлбэтигэр баар уонна бу эргиннээҕи элбэх кыбартыыралаах таас дьиэлэр олохтоохторун хабар буолан, быыбардааччы баһыйар өттө, сааскы чэбдик салгынынан тыынаары, сатыы кэлэн барар. Дыбарыас иккис этээһигэр оҕо аймаҕы аралдьытар элбэх оонньууну тэрийбиттэр эбит. Онон ити массыына үксэ оҕолорун илдьэ кэлбит төрөппүттэр киэнэ буолуохтаах.
Быыбардыыр учаастакка киирдэххинэ, аан аттыгар Дьокуускай куорат дьаһалтатын үлэһиттэрэ олороллор. Кинилэр ким баҕалааҕы аатын-суолун толору суруйан, илии баттатан баран, киин куораты тупсарыахтаах 8 бырайыактан талар бюллетени туттаран кэбиһэллэр. Онно эмиэ быыбарга курдук, ханнык бырайыагы чорботоргор бэлиэ туруоран, туспа турар уурунаҕа угаҕын.
Били быыбардааччылары угуйуохтаах чэпчэки сыанаҕа атыыланар сымыыты эрдэ кэлбит быыбардааччылар сотон барбыттар. Арай, кураанах остуолга сытар кумааҕыттан көрдөххө, Нерюнгритааҕы көтөр фабрикатын 2-с суортаах сымыыта 4 солк. 95-тии харчыга атыыламмыт. Бройлер этэ эмиэ бүтэн эрэр. Онон ким эрдэлээбит, аҕыйах солкуобайынан даҕаны буоллар, барыһырдаҕа.
Василий НИКИФОРОВ, «Саха сирэ» хаһыат, edersaas.ru