Манчаары Оонньууларыгар бүгүн мас тардыһыытыгар муҥутуур кыайыылааҕы быһаардылар. Күрэскэ алта мадьыны суруттарда: Иннокентий Миронов (Өлүөхүмэ), Анатолий Баишев (Амма), Владимир Шарин (Дьокуускай), Дмитрий Попов (Уус Алдан), Сергей Кисилев (Нерюнгри) уонна Эрчим Бппаҕай (Үөһээ Бүлүү).
Бастакы көрсүһүүгэ Анатолий Баишев Иннокентий Мироновы 2:0 ахсаанынан баһыйа тутта. Эрчим Баппаҕай Сергей Кисилевы кытта киирсиилэрэ 2:1 ахсаанынан олохтоох баабый туһатыгар түмүктэннэ. Оттон Владимир Шарин Дмитрий Попову утары тугу да оҥорбото, 0:2 ахсаанынан хоттордо. Ол кэнниттэн Эрчим Баппаҕай Анатолий Баишевтан маһын иккитэ тоҕо тардан ылла.
Ол эрээри, көрөөччүлэр хомойуохтарын быатыгар, муҥутуур кыайыылааҕы быһаарар түмүк күөн көрсүһүү буолбата — Дмитрий Попов эчэйиилээҕинэн, кыайыы Эрчим Баппаҕайга быһа бэрилиннэ.
Онон үбүлүөйдээх Манчаары оонньууларын муҥутуур кыайылааҕынан Эрчим Баппаҕай ааттанна, биир дойдулаахтарын уруйдарын-айхалларын ылла.
Роман Попов, «Саха сирэ» хаһыат