Эр санааланыы уруога
· - Олох-дьаһах

Эр санааланыы уруога

Эр санааланыы уруога Дьокуускайга төрдүс төгүлүн ыытылынна. Бу туһунан Дьокуускай куорат иһитиннэрэр-биллэрэр сириэстибэлэри уонна уопсастыбаннаһы кытары сибээскэ Департамена сырдатта. 


Улуу Кыайыы өрөгөйдөөх күнүн көрсө, «Туймаада саллаата» мемориальнай комплекска  Ленинград куорат фашистскай блокадаттан босхоломмута 75 сылыгар аналлаах «Ленинград. Блокада. Подвиг» аһаҕас уруок IV төгүлүн ыытылынна.

Үөрүүлээх тэрээһиҥҥэ Ил Түмэн дьокутаата, наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева, Дьокуускай куорат баһылыга Сардаана Авксентьева, СӨ үөрэх уонна наука миниистирин бастакы солбуйааччы Ирина Любимова, Дьокуускай куорат Дууматын бэрэссэдээтэлэ Альберт Семенов, Ленинград куорат блокадатын кыттыылаахтара уонна блокада оҕолоро, Аҕа дойду Улуу сэриитин, тыыл, үлэ бэтэрээннэрэ, ыччат, оскуола үөрэнээччилэрэ, куорат олохтоохторо уонна ыалдьыттар кытыннылар.

Аһаҕас уруогу «Сыл учуутала — 2019» куонкурус кыайыылааҕа, Саха политехническэй лиссиэй историяҕа уонна обществоҕа преподавателэ Алексей Ягловскай 10-с кылаас үөрэнээччилэрин кытары  ыытта. Эр санааланыы уруога Ленинград куораты блокадаттан босхолооһуҥҥа дьоруойдуу охсуспут дьоҥҥо бука барыларыгар ананна.

Куорат баһылыга Сардаана Авксентьева оҕолорго сүрэҕэр-быарыгар өрүү чугастык тутар күндү киһитэ — эһээтэ барахсан хара дьайдаах фашистартан төрөөбүт Ийэ дойдутун көмүскүү сылдьан, Сталинград анныгар сураҕа суох сүппүтүн туһунан долгуйан туран кэпсээтэ. Сардаана Владимировна Ленинград куораты блокадаттан босхолооһуҥҥа кыттыбыт хорсун санаалаах  дьону, куорат олохтоохторун — дьахталлары, оҕолору, кырдьаҕастары үйэттэн үйэҕэ сүгүрүйэн ахта-саныы сылдьар ытык иэстээхпитин бэлиэтээн эттэ.

«Бу күн биһиги оҕо саас дьоллоох күннэрин, ыраас, эйэлээх халлааны билбэккэ, уоттаах сэрии ыар сылларыгар улахан дьону кытары тэҥҥэ сыраласпыт, үлэлээбит, аччыктыыр аас-туор олох ыараханын этинэн-хаанынан билбит сэрии сылларын оҕолорун улаханнык долгуйан, курутуйан ахтан-санаан  ааһабыт. Биһиги кинилэргэ сүһүөхтээх бэйэбит сүгүрүйэр, хоолдьуктаах бэйэбит хоҥкуйар ытык иэстээхпит«, — диэтэ Дьокуускай баһылыга Сардаана Авксентьева.

Эр санааланыы уруогун кыттыылаахтара бары Аҕа дойду уоттаах сэриитин сылларыгар дьон-сэргэ, бүттүүн норуот, хайдахтаах эрэйи эҥэринэн тэлбитин, кыһалҕаны көрсүбүтүн, хайдахтаах ыараханы тулуйбутун, хорсуннук-хоодуоттук хара санаалаах фашистары утарсыбытын, олохторун толук ууралларын кэрэйбэккэ, Улуу Кыайыыны уһансыбыттарын аҕыннылар.

Ленинградка төрөөбүт, бэтэрээн Евгения Слепцова иэдээннээх кэмнэри улаханнык уйадыйан туран кэпсиир: — 1942 сыллаахха, эвакуациялыылларыгар, мин үстээх эрэ оҕочоон этим. Оччолорго киһи барыта туос аччык, аһаах, мөлтөх, ырыган буоллахтара. Өйдүүбүн ээ, ийэм барахсан биир күн хараҕын өрө көрбөккө үлэлээн хачымахтаһарын. Хомойуох иһин, блокада кэнниттэн ийэбин сүтэрбитим. Аҕабын өйдөөбөппүн. Байыаннай собуокка үлэлии сылдьан өлбүтэ дииллэрэ. Уралга оҕо дьиэтигэр иитиллибитим. 1960 сыллаахха медицинэ училищетын бүтэрэн баран, Саха сиригэр дьону-сэргэни эмтии, үлэлии кэлбитим, — диир блокадница.

Эр санааланыы аһаҕас уруогун кыттыылаахтара бука бары,»Туймаада саллаата» мемориалга тыыннаах сибэкки дьөрбөтүн уурдулар, чочумча саҥата суох соҥуоран турдулар, сүгүрүйдүлэр.

Хаартыскалар: Дьокуускай куорат иһитиннэрэр-биллэрэр сириэстибэлэри уонна уопсастыбаннаһы кытары сибээскэ Департамена

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

11 + пять =