Бэрээдэк Уопсастыба

Эр киһи төлөпүөнүнэн үөҕэн сууттанна

Дьахталлар эрэ буолбакка, эр дьон да эмиэ этистэҕинэ этиһэр, үөҕүстэҕинэ үөхсэр. Бэл диэтэр, сууттаһар.  

edersaas.ru

Биир оннук дьыала Мирнэй мировой суутугар көрүллүбүтүн туһунан СӨ Борокуратууратын пресс-сулууспата иһитиннэрдэ.

Дьыала биир киһиттэн борокуратуураҕа сайабылыанньа киирбититтэн саҕаламмыт.

Үҥсүбүт киһи быһаарбытынан, кини Т. диэн гражданинныын бэйэ-бэйэлэрин истэригэр киллэрсибэт, сөбүлэспэт буоланнар кыыһырсыбыттар. Онуоха анараата хаста да төлөпүөнүнэн эрийэн, ол-бу диэн дэлби үөхпүт. Оттон киһини сирэй ааттаан, личность быһыытынан түһэрэн саҥарыы, буолаары буолан, ыыс-бурут тылларынан үөҕүү иһин административнай эппиэтинэс көрүллэр.

Борокуратуура ити сайабылыанньанан бэрэбиэркэ ыыппыт. Ол бэрэбиэркэ быһаарбытынан уонна судебнай-лингвистическай чинчийии түмүгүнэн, төлөпүөннээн үөхсүбүт гражданин тылыгар-өһүгэр киһи чиэһин уонна дьоһунун түһэрэр, үөҕэр, ыыс-бурут, маатыра тыллара бааллар эбит.

Итинэн сибээстээн, борокуратуура Т. диэн киһиэхэ РФ Административнай кодексатын 5.61-с ыст. 1 чааһынан дьыала тэрийбит.

Мировой суут ол дьыаланы көрөн, бу киһини ити ыстатыйанан буруйдааҕынан билинэн, 1 тыһ. 200 солк. суумалаах ыстараап төлүүргэ уурбут.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

0
0

Добавить комментарий