Эр киһи дуу, дьахтар дуу? IAAF Соҕуруу Африка сүүрүүгүн эр киһинэн билинэргэ бэлэм

Чэпчэки атлетика федерацияларын аан дойдутааҕы ассоциацията (IAAF) Спорт арбитражнай суутугар (CAS) Соҕуруу Африка сүүрүүгүн, Олимпийскай оонньуулар икки төгүллээх чөмпүйүөннэрин Кастер Семеняны бэйэтин дьахтар курдук сананар эр киһинэн билинэр туһунан этии киллэрэргэ оҥостор. Бу туһунан The Times иһитиннэрэр.

edersaas.ru

Тэрилтэ үрдүк тестостероннаах дьахтар спортсменнар гормон таһымын аччатар анал эмтэри иһэр эрэ түгэннэригэр IAAF былааҕынан ыытыллар күрэхтэһиилэргэ кытталларын көҥүллүүр туһунан быраабыланы киллэрэр санаалаах.

Бу иннинэ Семеня, маннык быраабыланы киллэриини утаран, CAS-ка ирдэбил түһэрбитэ. Суут кэлэр нэдиэлэҕэ буолар.

Семеня сүүрэр суолга чаҕылхай кыайыыларын кэнниттэн күрэстэһээччилэрэ тута кинини эр киһи буоларыгар уорбалаабыттара. Ол эрээри анал чинчийии Соҕуруу Африка быһыйа дьахтар буоларын, арай тестостерона үрдүк диэн быһаарбыта.

Санатан эттэххэ, Семеня 800 м сүүрүүгэ аан дойду икки төгүллээх чөмпүйүөнүнэн, Олимпийскай оонньуулар икки төгүллээх кыайыылаахтарынан буолар.

Роман Попов, edersaas.ru

Хаартыска Интэриниэттэн ылылынна.