«Эр хаан» уолаттардаах аҕалары түмтэ

Ааптар: 
Бөлөххө киир:

Киһи өйүгэр-санаатыҥар хаалар, дууһаны сылаанньытар тэрээһин үгүс.

Ол курдук, дьиэ кэргэнинэн эр дьон хамсааһынын көҕүлүүр сыаллаах «Эр Хаан» диэн  өрөспүүбүлүкэтээҕи кэтэхтэн ааҕыы бастакы  куонкуруһа ыытыллыбыта. Бу туһунан Уус Маайа улууһуттан Эдьээнтэн биһиги уопсастыбаннай кэрэспэдьиэммит Ирина Винокурова бу курдук сырдатар:

Бу ааҕыыларга эһэ, аҕа уолаттарын кытта эбэтэр хаан уруу аймахтарынан кытыннылар. Бэрт сэргэх бастакы саҕалааһыҥҥа коронавирус сыстыганнаах дьаҥынан сибээстээн, аҕыйах киһи кытынна. Ол да буоллар, Чурапчыттан, Бүлүүттэн, Тааттаттан, Уус Маайаттан уонтан тахса дьиэ кэргэн ситиһиилээхтик күрэстэстилэр. Кылаан чыпчаал кыайыылааҕынан Чурапчыттан Андрей Васильевич Дьоллоохоп дьиэ кэргэнэ таҕыста. Лауреат аатын Чурапчы Хадаар нэһилиэгиттэн Иван Петрович Лукин , «Норуот биһирэбилэ» бочуоттаах ааты Бүлүү Баппаҕаайытыттан төрүттээх Алексей Иванович Яковлев дьиэ кэргэнинэн ыллыллар, спонсордар туруорбут харчыларынан бириэмийэлэннилэр. Атын кыттааччылар бары тустаах анал ааттарынан биһирэннилэр.
Биһиги улууспутуттан Андрей Дмитриевич Иванов түөрт уолун кытта кытынна. Кинилэр үс саастаах уолчааннара Матвей Петр Тобуруокап «Тоҕо күммүт тыгарый?» диэн хоһоонун ааҕан чаҕаарыйбыта, онтон аҕалара биир дойдулаахпыт Дмитрий Апросимов хоһооннорун бэрт итэҕэтиилээхтик, дуоспуруннаахтык аахпыта киһини долгутар, чахчы да ыал оҕолорунан дьоллооҕун итэҕэтэр. Кинилэр «Саргылаах дьиэ кэргэн» анал аакка тигистилэр. Бу бастакы бырайыагы саҕалаабыт «Уолан ааҕыыларын» төрүттээбит Акулина Кузьминаҕа уонна аҕалар лигаларын бэрэссэдээтэлэ Айхал Габышевка, Чурапчы улууһун дьаһалтатыгар бу кэскиллээх бырайыагы өйөөбүттэригэр улахан махталбытын тиэрдэбит.
Өрөспүүбүлүкэ дьиэ кэргэнэ бу бэртээхэй кэскиллээх тэрээһиҥҥэ көхтөөхтүк кыттыҥ, эр дьон түс-бас олохтоох тылларын биһиги чулуу суруйааччыбыт эппит-тыыммыт кэрэкэ тылларын ыччаттарбытыгар тиэрдэн иһиэҕиҥ! Сахалыы саҥа сайда турдун диэн баҕа санаабын этэбин.

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа Ивановтар дьиэ кэргэн (Уус Маайа).

+1
0
+1
0
+1
0
+1
0
+1
0
+1
0
+1
0