Таатта улууһугар нэһилиэктэринэн эр дьон түмсүүлэрэ тэриллэн үлэлииллэр. Нэһилиэктэригэр үөскээбит кыһалҕаны түмсэн быһаараллар, үлэни-хамнаһы кыайа-хото туталлар, булка-алка сыһыаннаах киэҥ кэпсэтиилэри оҥороллор, күрэхтэһиилэргэ туруналлар, эдэрдэригэр сүбэ-ама буолаллар, чөл уонна чэгиэн олоҕу өрө тутарга көхтөөх, тиһиктээх үлэни тэрийэллэр, о.д.а. олоххо-дьаһахха туһалааҕы, кэскиллээҕи оҥорорго ылсаллар. Соторутааҕыта Хара Алдан уонна Уус Таатта эр дьоно түмсэн сүбэ-саргы мунньаҕын оҥорбуттар.
Улуустааҕы култуура уонна духуобунай сайдыы управлениетын начаалынньыга Гаврил Вырдылин кэпсээбитинэн, булт, балык, сир-уот, сиэр-туом, үгэс, бэрээдэк, чэгиэн буолуу, чөл турук, иллээх дьиэ кэргэн олоҕо, оҕону иитии, тутуу, от-мас үлэтэ, уо.д.а. боппуруостарга түмсэн, атах тэпсэн олорон ирэ-хоро сэһэргэспиттэр. Ыйытыыларыгар толору хоруйдары көрдөөбүттэр. Ытык дьоннорун ыҥыран, кинилэр кэскиллээх муударай тылларын истибиттэр. Маны сэргэ, кинилэргэ анаан бу күн элбэх функцияны толорор киинтэн араас ыйытыыларыгар толору хоруйдар бэриллибиттэр, биэнсийэ, субсидия боппуруостарыгар анаан-минээн сүбэ-ама оҥоһуллубут.
—Мунньаҕы улуус баһылыгын бастакы солбуйааччы Иван Потапов салайда. Улуустааҕы эр дьон түмсүүтүн салайааччыта, социальнай харалта управлениетын начаалынньыга Михаил Тарасов ааспыт сыл үлэтин-хамнаһын сырдатта. Эколог Петр Неустроев балыктааһыҥҥа киирбит саҥа сокуоннары билиһиннэриитин улаханнык болҕойон иһиттилэр, санааларын үллэһиннилэр. Салгыы улуус дьаһалтатын исписэлииһэ Никита Быгынанов Уһук Илиҥҥи гектар боппуруостарын сырдатта, сири үллэрии ымпыгын-чымпыгын билиһиннэрдэ. Ыччат уонна дьиэ кэргэн отделын салайар Иван Иванов алгыс сиэрин-туомун оҥорбутун мустубут эр дьон ис сүрэхтэринэн ылыннылар, — диэн кэпсээтэ. Бу долгутуулаах уонна эппиэттээх күн «Үс түмсүү» Тааттатааҕы салаата эр дьону итэҕэлгэ, чөл олоххо сыһыарар үлэтин саҕалаабытын, эр дьон итэҕэлгэ, оҕону иитиигэ үлэлэһиэхтээхтэрин туһунан Гаврил Вырдылин иһитиннэрбит.
Мунньах түмүгэр Хара Алдаҥҥа эр дьон түмсүүтүн салайааччытынан Иван Левчиковы биир санаанан талбыттар. Онтон Уус Тааттаҕа Иван Колодезниковы нэһилиэктээҕи түмсүүнү сатабыллаахтык салайар диэн туран, эппиэттээҕинэн хаалларар ордугун бэлиэтээн туран, биир киһи курдук куоластаабыттар. Маныаха нэһилиэк баһылыга Владимир Борисов эр дьону түмэргэ сөптөөх үлэни ыытара эмиэ бэлиэтэммит, атыттарга холобур да буолар кыахтаах диэн этиллибит.
Тэрээһиҥҥэ мустубут эр дьон бука бары олунньу 22 күнүгэр улуус эр дьонугар тэриллэр сугулааҥҥа көхтөөхтүк кыттар, атын түмсүүлэр санааларын истэр, үлэ үөрүйэҕин атастаһар улахан баҕалаахтарын биллэрбиттэр. Онон, таатталарга эр дьон түмсүүлэрэ үлэҕэ-хамнаска күүскэ туруннулар.
Биһиги корр., «Саха сирэ» хаһыат, edersaas.ru