Эр дьон сүргэтэ көтөҕүллэн оһуохайдаата

Ааптар: 
Бөлөххө киир:
  1. Бүгүн Дьокуускай куоракка Комсомуоллар болуоссаттарыгар РФ Бэрэсидьиэнэ Владимир Путин дойдутун туһугар ыытар бэлиитикэтин уонна Арассыыйа саллааттарын уонна эписиэрдэри өйүүллэрин, эр дьон эдэриттэн эмэнигэр диэри оһуохайдаан бигэргэттилэр. 

Манна улуустар баһылыктара, чугастааҕы нэһилиэктэртэн эр дьон, устудьуоннар, үлэлиир ыччат, оскуола оҕолоро бааллар.

Суолталаах тэрээһиҥҥэ Ил Дархан Айсен Николаев уонна Дьокуускай куорат мээрэ Евгений Григорьев  кыттыыны ыллылар.

Биһиги, Саха сирин олохтоохторо,  Арассыыйа дьоно бары түмсүүлээх, биир санаалаах буоллахпытына, тугу барытын кыайыахпыт. Сахалыы ньиргиччи «Уруй уонна Айхал!» — диэн Ил Дархан айхаллааһынын болуоссакка мустубут дьон дорҕоонноохтук уруйдаатылар.

Бойобуой дьайыылар 90-с сыллардааҕы кыттыылааҕа, Өксөкүлээх Өлөксөй аатынан Норуоттар доҕордоһууларын дьиэтин генеральнай дириэктэрин 1-кы солбуйааччы Александр Колесов төлөннөөх этиитин болуоссакка кэлбит дьон айхаллаан көрүстүлэр.

— Тыһыынчанан киһи кэлэн биир сомоҕоҕутун көрдөрбүккүтүнэн киэн туттабын. Бүгүн Арассыыйа үрдүнэн хас куорат аайы тахсан, сүүһүнэн тыһыынча киһи муһунна.

Биһиги дойдубутун ханнык да күүс самнарбатаҕа, инникитин даҕаны кыайыахтара суоҕа! Оннук буолбат дуо? — диэн болуоссакка турар дьонтон ыйыппытыгар, бары биир киһи курдук «Оннук!» диэн хардардылар.

Хаҥалас Нөмүгүтүттэн бааһынай хаһаайыстыба салайааччыта  Дмитрий Парфенов эр дьон оһуохайыгар анаан оҥостон кэлбит.

Биһиги, эр дьон, Арассыыйабыт бэрэсидьиэнин бэйэбитинэн өйөөбөтөхпүтүнэ уонна ким өйүөй? Маннык тэрээһин дууһабытыгар дойдуга бэриниилээх буолуу иэйиитин уһугуннарар, сүрү көтөҕөр, күүс-уох биэрэр. Сомоҕолоһуу баар сиригэр кыайыы, өйөһүү, өйдөһүү баар, сырдык санаа кыыма саҕыллар. Ол иһин мин тус бэйэбинэн бу маннык тэрээһиҥҥэ кыттыахтаахпын өйдөөн, анаан кэллим. Эр дьон оһуохайа буоларын туһунан батсааптан билбитим. Ол кэннэ сыыйа хомунан, бэлэмнэнэн барбытым. Баһаам киһи кэлбит. Массыынабын нэһиилэ миэстэ булан туруордум. Бачча кэлбиччэ, бүтэһигэр диэри сылдьан барыам, — диэн санаатын үллэһиннэ Дмитрий Васильевич.

Эр дьон оһуохайыгар устудьуон уолаттар хото кэлбиттэр. Ол курдук, Өймөкөөннөрүн былааҕын киэн туттан тута сылдьар Кристиан Егоров уонна Дмитрий Егоров өрөспүүбүлүкэ улуустарын Землячествотыттан кытта сылдьалларын эттилэр. Кристиан юрист идэтигэр иккис кууруска, Дмитрий стоматолог идэтигэр бастакы кууруска орто анал үөрэхтэргэ үөрэнэ сылдьаллар эбит. «Бары тэрээһиннэргэ көхтөөхтүк кыттабыт, араас улуустар ыччаттарын кытта бииргэ сылдьарбыт олус үчүгэй. Бэйэ бэйэбититтэн элбэххэ үөрэнэбит», — диэн эдэр дьон санааларын тиэртилэр.

Өлүөхүмэ ыччата, АГИКИ-га  режиссер үөрэҕэр үөрэнэр Афанасий Кугасов улууһун ыччаттарын түмсүүтүн салайар эбит. Өлүөхүмэ уолаттара эмиэ бары бииргэ мустан, сомолоһууларын биллэрэн оһуохайга кэлбиттэр.

Болуоссат иһэ биир чаас иһигэр санаалара өрө көтөҕүллүбүт эр дьонунан туола түстэ. Араас улуустартан кэлбиттэрэ харахха быраҕыллар. Онон Арассыыйа саллааттарын уонна эписиэрдэрин өйүүр тэрээһиҥҥэ өрөспүүбүлүкэ эр дьоно анаан кыттыыны ылла диэтэхпинэ, арааһа, сыыспатым буолуо.

Эр дьон оһуохайа саха уоланнара сомоҕолоһуулаахтарын арылхайдык арыйда. Дьон «аны аҕыйах хонугунан Саха АССР  100 сылын бэлиэтиир оһуохайга сахалыы таҥаспытын кэтэн, анаан мустуохпут» диэн тарҕастылар.

Елена ПОТОЦКАЯ, «Саха сирэ» хаһыат. 

Хаартыскалар: ааптар түһэриилэрэ уонна устуута, интэриниэт аһаҕас ситимнэриттэн ылылыннылар.

+1
0
+1
0
+1
0
+1
0
+1
0
+1
0
+1
0