Эппилиэттээх эр бэртэрэ күрэстэстилэр

Бөлөххө киир:

Эппилиэттээх үлэһиттэр бары да, дьон нус-хас олоҕор кыһанар, ыксаллаах быһыыга-майгыга араҥаччылыыр, көмүскүүр аналлаахтар. Бу эйгэ үлэһиттэригэр махталы биллэрэн, кинилэр үлэлэригэр сырдыгы сыдьаайан Сунтаар улууһун дьахталларын сүбэтэ бэртээхэй күөн күрэһи тэрийдэ.

edersaas.ru сайтка анаан Мария Кобельянова, Тускулаана

«Эппилиэттээх эр бэртэрэ» диэн күрэскэ Сунтаардааҕы Ис дьыала салаатын уонна баһаарынай сулууспа үлэһиттэрэ, үстүү киһилээх хамаанданан араас түһүмэххэ тургутууну аастылар. Ис дьыала салаатын хамаандатыгар: Николай Лаптев (ГИБДД сотруднига), Василий Пахомов (полиция хапытаана), Виктор Иванов (полиция үлэһитэ), оттон баһаарынай сулууспаттан: Сунтаартан Юрий Иванов, Сиэйэттэн Александр Романов, Кириэстээхтэн Валерий Пайдютов кыттыыны ылан, тэрилтэлэрин көмүскээтилэр.

Күн бастакы аҥаарыгар эр бэртэрэ буулдьанан ытыыга, эт-хаан күүһүгэр-уоҕугар ким бастыҥын быһаардылар. Буулдьанан ытыыга 65,1 очкону ылан Юрий Иванов бастаата, Николай Лаптев (61,5 очко) иккис миэстэҕэ, үһүскэ Василий Пахомов (58,3 очко) таҕыстылар. Салгыы эт-хаан күүһүн холонууга Сунтаардааҕы Ис дьыала салаата инники кэккэҕэ таҕыста.

Аны киэһэ өттүгэр эппилиэттээх дьоммут бэйэлэрин билиһиннэрдилэр, билиилэрин тургуттулар уонна талааннарынан көрдөрдүлэр. Валерий Пайдютов бэйэтэ чуваш омугун билиһиннэрэн, олус истиҥ ырыаны көрөөччүлэргэ бэлэхтээтэ. Тойбохой уола Виктор Иванов тустуу албастарын көрдөрдө. Оттон Александр Романов биэс оҕолоох ыал амарах аҕата буоларын, өссө ону ааһан, элбэх оҕолоох ыаллар түмсүүлэрин тутаах киһитэ буоларын туһунан билиһиннэрдэ.

Тэрээһин түмүгүнэн, бастакы миэстэни Сунтаардааҕы Ис дьыала хамаандата ылла. Эппилиэттээх эр дьоннор күрэстэрэ мантан инньэ сылын аайы тэриллэн ыытыллара быһаарылынна.

edersaas.ru сайтка анаан Мария Кобельянова, Тускулаана

+1
0
+1
0
+1
0
+1
0
+1
0
+1
0
+1
0