Эппиэтинэһи үрдэтиэххэ, устуоруйаны биллэриэххэ, байыаннай уруогу киллэриэххэ
«Өлбөт үйэлээх полк» тэрийээччилэрэ бу хамсааһыҥҥа нацистар хаартыскаларын ыыппыт дьон дааннайдарын РФ Силиэстийэлиир кэмитиэтигэр биэриэхтэрэ. Бу туһунан «Кыайыы волонтердара» хамсааһыны салайар Ольга Амельченкова иһитиннэрбитин туһунан РИА Сонуннара суруйар.
Санатан эттэххэ, быйыл «Өлбөт үйэлээх полк» аахсыйа коронавирус пандемиятыттан онлайн-форматынан ыытылынна. «Россия сегодня» МИА пресс-кэмпириэнсийэтигэр Амельченкова киллэриллибит сайаапкалар ортолоругар, хомойуох иһин, Сэбиэскэй норуот хорсун быһыытын сыаналаабат, тэпсэр түбэлтэлэр тахсыталаабыттарын туһунан иһитиннэрбит.
Маны ааҕан баран, РФ Үлэ Дьоруойа Варвара Устинова санаатын тиэртэ:
—Арассыыйа дьонун-сэргэтин хомотор кыбыстыылаах содуллары түктэри санаалаах, устуоруйаны билбэт ньүдьү-балай дьон оҥороллор. Мин санаабар, ханнык да суол-иис сокуонунан хааччахтанара ордук. Бу сокуоммут сымнаҕаһыттан уонна ону таһынан, оҕо кыратыттан төрөөбүт дойдутугар бэриниилээх буоларын ситиспэтэхпититтэн, оннук өйгө-санааҕа күүскэ ииппэтэхпититтэн, норуот хорсун быһыытын такайбатахпытыттан, маннык хомолтолоох сыыһалар-халтылар, төттөрү өйдөбүллэр тахсыталыыллар.
Сүрүннүүр сокуоммутугар киирбит саҥа уларытыыларга олоҕуран, үөрэх салаатыгар, алын сүһүөх кылаастан саҕалаан эбии байыаннай үөрэх уруогун сүрүн биридимиэт быһыытынан киллэрэр уолдьаста дии саныыбын. Эбиитин эксээмэн туттарыылаах оҥоруохха. Хас биирдии оҕо төрөөбүт дойдутун устуоруйатын дьиҥ кырдьыгын биэс тарбаҕын курдук билиэхтээх уонна таптыы, көмүскүү үөрэниэхтээх диэн сыалы-соругу туруоран сорудахтыахха. Ону сэргэ, түктэри кэмэлдьини тарҕатааччыларга анаан, уголовнай кодекска кытаанах ыстатыйалары киллэрэр уолдьаста быһыылаах диэн көрөбүн.
Дойдубутун таптыаҕыҥ, араҥаччылыаҕыҥ. Эйэлээх олоҕу уһансыбыт норуоппутугар сүгүрүйүөҕүҥ.