Эпос уонна ускуустуба Арктическай киинин тутуутун туһунан Ил Дархан Айсен Николаев өрөспүүбүлүкэ судаарыстыбыннай сүбэһитин Андрей Борисовы кытта көрсөн кэпсэттэ.
“Омук быһыытынан үйэлэр нөҥүө харыстаан аҕалбыт духуобунай сыаннастарбытын оннунан хаалларарга норуот үгэстэрэ ураты суолталаахтар. Ол иһин, Олоҥхо дьиэлэрин ситимин тутуу олус суолталаах соругунан буолар” – диэтэ Андрей Борисов.
“Саха героическай эпоһа олоҥхо — киһи-аймах тылынан уонна өйүнэн айбыт култуурунай нэһилиэстибэтин чулуу айымньытын быһыытынан билиниллиэҕиттэн, биһиги эпическэй нэһилиэстибэбитин үөрэтиигэ уонна чөлүгэр түһэриигэ кэккэ көҕүлээһиннэр оҥоһулуннулар. Эпос уонна ускуустуба Арктическай киинин тутуу онно сөптөөх усулуобуйаны тэрийиэҕэ”, — диэн бигэргэттэ Ил Дархан.
Эпос уонна ускуустуба Арктическай киинин тутуута 2024 сылга түмүктэниэхтээҕин санатта. Соторутааҕыта тутуу ыытылла турар сиригэр тиийэн Ил Дархан бэдэрээччиккэ үлэни түргэтэтэргэ сорудахтаабыта.