“ЭпиВакКорона” быһыыны ылбыт дьон босхо анаалыс туттарыахтарын сөп диэн “Роспотребнадзор” Саха сиринээҕи управлениета иһитиннэрэр. Бу ИФА-анаалыс быһыы кэннэ төһө “антитела” үөскээбитин быһаарар.
Санатар буоллахха, “ЭпиВакКорона” пептиднэй вакцинаны ылан баран, киһи билигин атын быһыыларга туттуллар анаалыһы туттардаҕына, төһө “антитела” үөскээбитин көрдөрбөт. Ол иһин „SARS-CoV-2-IgG-Вектор“ диэн анал тест-систиэмэни оҥорбуттара. Пептиднэй вакцина уратылаах буолан, быһыы кэнниттэн төһө “антитела” үөскээбитин бу тест эрэ көрдөрөр.
“Роспотребнадзор” иһитиннэрбитинэн, бу ИФА тест-систиэмэлэри “ЭпиВакКорона” быһыы бэриллибит эрэгийиэннэригэр барыларыгар тарҕаталлар. Онон бу анаалыһы босхо туттарыахха сөп буолла. Бастакы укуол кэнниттэн 42 күн ааспытын эрэ кэнниттэн, хоруона дьаҥар иммунитет үөскээбитин быһаарыахха сөп.
Бу анаалыһы туттарарга быһыыны ылбыт поликлиникаҕытыгар бараҕыт.
“ЭпиВакКорона” — синтетическэй вакцина, ол эбэтэр киниэхэ тыыннаах вирус суох. Онон киһиэхэ сымнаҕастык дьайар, сааһырбыт уонна олоҕурбут ыарыылаах дьоҥҥо биэриэххэ сөп. Бу быһыыны оҥорбут “Вектор” научнай киин үлэһиттэрэ коронавирус саҥа штаммнарыгар эмиэ дьайыылаах диэн этэллэр.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru