«ЭпиВакКорона» көдьүүһэ — 95,8%

Бөлөххө киир:

«Роспотребнадзор” Эпидемиологияҕа научнай институтун дириэктэрин солбуйааччы Александр Горелов “Россия” ханаалга “ЭпиВакКорона” быһыыны ылбыт дьон 95,8%-гар “антитела” сөптөөх кээмэйэ үөскээбит диэн кэпсээтэ. Оттон 4,2%-гар “антитела” үөскээбэтэх. Төһө киһини чинчийбиттэрин чуолкайдаабата.

Бу – үрдүк көрдөрүү. Холобур, “КовиВак” быһыы көдьүүһэ 80% диэн оҥорон таһаарааччылар иһитиннэрбиттэрэ. Оттон «Спутник» көдьүүһэ — 95%. 

Санатар буоллахха, “ЭпиВакКорона” — пептиднэй платформаҕа оҥоһуллубут быһыы, көннөрү анаалыс туттардахха, төһө “антитела” үөскээбитэ көстүбэт. Ол иһин оҥорон таһаарааччылар анал тест-систиэмэни айан, эрэгийиэннэргэ тарҕаппыттар. Соторутааҕыта “Роспотребнадзор” Саха сиринээҕи управлениета маннык тест-систиэмэлэр кэллилэр, быһыыны ылбыт поликлиникаҕытыгар баран, босхо анаалыстанар кыахтааххыт диэн иһитиннэрбитэ.

Ону тэҥэ, сорох лабораторияларга баран, харчы төлөөн, туттарыахха сөп буолла. Холобур, дойду үрдүнэн “Гемотест”, “Ситилаб”, “Хеликс” лабораторияларга тарҕаппыттар. Дьокуускайга “Гемотест” икки лабораторията үлэлиир. Анаалыһы быһыы бастакы укуолун ылбытыҥ 42 хонук ааспытын эрэ кэннэ туттарарыҥ оруннаах.

Бу быһыыны оҥорбут “Вектор” вирусология уонна биотехнология научнай киинэРоспотребнадзор” иһинэн үлэлиир. “ЭпиВакКорона” быһыы 2020 сыл алтынньы 14 күнүгэр регистрацияламмыта.

Ангелина Васильева, “Саха сирэ” хаһыат, edersaas.ru

Хаартыска: sakha.gov.ru

+1
0
+1
0
+1
0
+1
0
+1
0
+1
0
+1
0