Бу күннэргэ дьон ханна сыана чэпчэкитин, туох ыараабытын сураһар. Чернышевскай уулусса 66 №-гэр баар кууһунан атыылыыр баазаҕа бырааһынньык өрөбүллэринэн сибээстээн дьон кэлиитэ-барыыта тохтообото.
Бородуукта сорох көрүҥнэригэр сыана үрдээбит буоллаҕына, сорох маҕаһыын-ыскылааттар сыаналарын тутан тураллар. 28 №-дээх ыскылаакка фрукта, оҕуруот аһын сыаната удамыр. Хата, эриэхэ ыарыа диэтэхтэрэ, эриэхэ араас көрүҥүн хото атыылаһаллар.
Сыа быыһыгар быччаххай кыбыллыбытын курдук диэн этэллэринии, ыарахан сыаналаах табаардар быыстарыгар чэпчэкини да булуохха сөп. Ол курдук, бу баазаҕа баар “Эпик” диэн таҥас-сап атыылыыр маҕаһыын сыанатын 40 бырыһыан чэпчэппит. Манна Киргизияҕа, Узбекистаҥҥа уо.д.а. тигиллибит-оҥоһуллубут таҥас-сап атыыланар. Табаар эрэ толору.
Бүгүн бырааһынньык иннинээҕи күн буолан, сорох маҕаһыыннар 16.00 чааска үлэлээн бүттүлэр. Сарсын өрүүбүт диэн биллэриилэри таһаарбыттар.
Сорох атыылаһааччылар “Токкоттан” баран саахар ылыахпыт, онно сыаната чэпчэки – 74 солкуобай дэһэллэр.
Бэлэмнээтэ Женни Стрюкова
Хаартыска: ааптар түһэриитэ