Саха сирин доруобуйатын харыстабылыгар өссө биир сүҥкэн түгэн буолла. Ахсынньы 16-17 күннэригэр төрүөхтэриттэн истибэт алта кырачааҥҥа кохлеарнай имплантацияҕа эпэрээссийэ оҥоһулунна. edersaas.ru
Кулгаах ыарыыларыгар научнай-клиническэй отдел салайааччыта, медицинскэй наука доктора, оториноларинголог-хирург Диаб Хассан уонна аудиология научнай-клиническэй отделын салайааччы, медицинскэй наука кандидата Антон Мачалов Саха сирин исписэлиистэрин үрдүк маастарыстыбаларын уонна таһымнарын бэлиэтээтилэр.
Өссө былырыын, 2017 с. бэс ыйыгар өрөспүүбүлүкэҕэ аан бастаан оҥоһуллубут холбоһуктаах эпэрээссийэ кэнниттэн биэс оҕо тулалыыр эйгэ тыаһын истэр, билэр буолбута. Эпэрээссийэ кэнниттэн биир нэдиэлэнэн кинилэргэ имплантаннары холбообуттарыгар оҕолор ийэлэрин куолаһын уонна тулалыыр эйгэни аан бастаан истибиттэрэ. Москва аудиолога Антон Мачалов: «Эпэрээссийэлэммит оҕолор киһи сибигинэйэн саҥарарын ыраахтан истэр, сорохтор бэл кэпсэтэр кыахтаммыттара», – диэн бу сырыыга эпэрээссийэлэммит алта оҕо эмиэ маннык үтүө түмүктэргэ кэлэригэр эрэнэрин биллэрдэ.
Наталья Лебедева, СӨ Доруобуйа харыстабылын министиэристибэтин штаты таһынан кылаабынай оториноларинолога:
«Кохлеарнай имплантацияҕа эпэрээссийэлэри оҥоруу Саха сирин оториноларинголог-хирурдарын үрдүк маастарыстыбаларын туоһулуур. Бу сырыыга Саха сирин эмчиттэрэ уустук эпэрээссийэни бэйэлэрэ оҥордулар. Биһиги өрөспүүбүлүкэ бырабыыталыстыбатыгар уонна Доруобуйа харыстабылын министиэристибэтигэр өйөбүллэрин иһин махтанабыт. Эһиги көмөҕүтүнүнэн өссө үрдүк үктэллэргэ тиийиэхпит!»
Надежда ЕГОРОВА, «Саха сирэ» хаһыат, edersaas.ru