Олох-дьаһах коммунальнай хаһаайыстыбатын уонна энергетикатын министиэристибэтин уопсастыбаннай сэбиэтэ күүһү (энергияны) харыстыыр сөбүлэҥнэри элбэх кыбартыыралаах дьиэҕэ киллэриини өйөөтө.
edersaas.ru
Бу туһунан «Саха Өрөспүүбүлүкэтин күүһү (энергияны) харыстыыр уонна улаатыннарар» сокуонун уларытыы мунньаҕар кэпсэттилэр.
—Коммунальнай өҥөлөргө тарыып икки ардыларынааҕы ураты тахсар эрэгийиэннэригэр, хомойуох иһин, күүһү харыстыыр тэрээһиннэр сатаан олоххо киирбэттэр. Тоҕо диэтэр, күүһү харыстыыр тэрилтэлэр угар харчылара төттөрү кэлэригэр тустаах сокуоннар суохтар. Дьиэни бас билээччи талбыт тэрилтэтин кытары күүһү харыстыыр сөбүлэҥи түһэрсэригэр анаан өрөспүүбүлүкэтээҕи сокуоҥҥа уларыйыы киириэҕэ, – диэн ОДьКХ министиэристибэтин сайдыыны уонна энергияны туһаныыны күүһүрдэр киин дириэктэрин солбуйааччы Оксана Васильева эттэ.
Бу докумуон Олох-дьаһах коммунальнай хаһаайыстыбатын, Үп, Экэниэмикэ министиэристибэлэрин, Сыана бэлиитикэтин судаарыстыбаннай кэмитиэтин кэллэктиибинэй үлэлэрин түмүгэ буолар.
Сокуон уларыйыыта ыйдааҕы кыбартыыра төлөбүрүгэр хайдах дьайыай, төһө кэминэн дьиэни бас билээччи экэниэмийэни этинэн-хаанынан билиэй, ресурсунан хааччыйар тэрилтэлэр хайдах сыһыаннаһыахтарай диэн уопсастыбаннай сэбиэт чилиэннэрэ ыйыттылар. Мунньах түмүгүнэн, энергияны күүһүрдэр, харыстыыр сокуону олоххо киллэрэргэ сөбүлэстилэр.
Виктория Бястинова, «Саха сирэ» хаһыат, edersaas.ru