«Якутскэнерго» ПАУо Киин электрическэй ситимин үлэһиттэрэ Майа-Чурапчы хайысханан ойуур баһаарыгар алдьаммыт ситими чөлүгэр түһэрэ сылдьаллар.
Ойуур баһаарыгар манна магистральнай ситим аҕыс тирэҕэ алдьаммыт. Билигин энергетиктэр саҥа тирэхтэри таҥа, туруора сылдьаллар. Ол иннинэ матырыйааллары аҕалбыттара уонна баҕаналары үүттээбиттэрэ. Чөлүгэр түһэрии суһал үлэтигэр Чурапчытааҕы уонна Майатааҕы РЭС-тэн 22 үлэһит итиэннэ аҕыс анал тиэхиньикэ тардылынна.
– Бу нэдиэлэ устатыгар Майа-Чурапчы ситимигэр сэттэ саҥа П тирэҕи уонна биир анкер тирэҕи туруоран, хапытаалынай өрөмүөнү бүтэриэхпит. Билигин саппаас ситиминэн хааччыйан олоробут, – диир КЭС дириэктэрин э.т. Михаил Варейкис.
Ойуур уота аны суоһаабатын туһугар өрөмүөннүр биригээдэлэр түүннэри-күннэри үлэлээннэр, тирэхтэргэ дьаама хаһаллар уонна минерализованнай балаһалары оҥороллор диэн КЭС пресс-сулууспата иһитиннэрэр.
Раиса Сибирякова, «Саха сирэ», edersaas.ru