Энергосбыт үлэһиттэрэ муус устарга ыыппыт декадаларын түмүгэр, уоту уоран туһана олорор дьоҥҥо 110 акт оҥоһуллубут, хоромньу уопсай суумата 4 мөл. солк. тэҥнэспит.
edersaas.ru
Уон хонук устата энергетиктар өрөспүүбүлүкэ үрдүнэн 4,3 тыһ. дьиэни, кыбартыыраны кэрийбиттэр. Ол түмүгэр, уоту туох да көҥүлэ суох уоран туһаныы 100 түгэнэ баара биллибит, онтон 53 түгэн Дьокуускай куоракка буолбут. Хоромньу суумата 3 мөл. солк. тэҥнэспит (киин куоракка – 1,9 мөл. солк.). Декада кэмигэр (урукку акталары ааҕан туран) 1,4 мөл. солк. төннөрбүттэр. Ыстараабы хойут төлүүр туһунан 36 сөбүлэҥ түһэрсибиттэр.
Хомойуох иһин, тэрилтэлэр эмиэ уоту уоран туһаналлар. Энергетиктар рейдэ кэмигэр 547 тэрилтэни кэрийбиттэр, 10 акт оҥоһуллубут, хоромньу уопсай суумата 1 мөл. солк. тэҥнэспит. Бу декада устата тэрилтэлэр (урукку акталары холбоон) 156 тыһ. солк. төннөрбүттэр.
Уоту уоран туһаныы сокуонунан бобуллар, буруйу кэһээччи административнай эппиэтинэскэ тардыллыан сөп. Биирдиилээн дьоҥҥо ыстараап суумата 10 – 15 тыһ. солк тэҥнэһэр. Дуоһунастаах дьоҥҥо – 30 – 80 тыһ. солк. эбэтэр биир сылтан икки сылга диэри үлэлэрин тохтотоллор, юридическай сирэйдэргэ ыстараап суумата 100 – 200 тыһ. солк. тэҥнэһэр.
«Электрическай уоту уоран туһаныыттан сылтаан олохтоохтор бары эмсэҕэлииллэр. Ол курдук, уот күүрүүтэ халбаҥнаан, хаачыстыбата уларыйан, электротехниканы алдьатыан сөп. Ону таһынан дьон оһолго түбэһиэн эбэтэр баһаар буолуон сөп. Онон энергетиктар уоту уоран туһаныыны бопсор үлэҕэ улахан болҕомтолорун уураллар», – диэн Энергосбыт сүрүн инженерин эбээһинэһин толорооччу Евгений Игумнов бэлиэтээн этэр.
Өскөтүн эһиги уоту уоран туһаныыны көрдөххүтүнэ, биллэххитинэ «Якутскэнергоҕа» маннык нүөмэргэ эрийиҥ: 8 (4112) 49-70-00 эбэтэр Энергосбыт контакт-киинин нүөмэригэр: 8-800-100-22-05, 8(4112) 498-498.
Анивера Акимова