Бүгүн социальнай ситимнэринэн ыйытыыларга Ольга Балабкина хоруйдаата.
Бүгүн СӨ Бырабыыталыстыбатын Бэрэссэдээтэлин солбуйааччы, ковиды бохсууга суһал ыстаап салайааччытын солбуйааччы Ольга Балабкина быһа сибээскэ социальнай ситимнэринэн таҕыста. Өрүү буоларны курдук, кэпсэтиини тэтимнээхтик ыытта. Үгүс ыйытыыга хоруйдаата:
—— Эн вакцинаны ылбытыҥ дуо?
— Ылан.
— Тымныы ковидка туох оруоллааҕый?
— Дьон таһырдьа сылдьыыта аччаан, ыарыыга сыстыы аҕыйыыр. Онон тымныыбыт туһалаах эбит.
— СӨ Ил Дархана быһыы ылбыта дуо?
— Ылаары бэлэмнэнэр.
— Олунньу 15 күнүн кэнниттэн хааччахтааһыны уһатыахтара дуо?
— Ити төһө киһи ыалдьыбытыттан, үтүөрбүтүттэн тутулуктаах.
— Быраабы араҥаччылыыр уорганнарга быһыыны биэриини саҕалаатылар дуо?
— ИДьМ поликлиниката бэйэтэ лабораториялаах.
— Оҕотун эмтэрэр ийэ быһыы ылыахтаах дуо?
— Хат уонна оҕо эмтэрэр дьахталларга быһыы көҥүллэммэт.
— Ковидтан оҕолорго быһыы биэриэхтэрэ дуо?
— Билиҥҥитэ суох. 18 саастарыттан ылаллар. Ол оннугар төрөппүттэргэ кирииптэн оҕолоругар быһыы ылларалларыгар сүбэлиэм этэ.
— 65+ үргүлдьү биэнсийэлэригэр олорон, эдэрдэргэ миэстэлэрин биэрэллэрэ хайдаҕый?
— Биэнсийэҕэ барар кэм кэлиэ…
— — Вакцинацияттан аккаастаннахпына үлэбин сүтэриэм дуо?
— Вирус олус кутталлаах. Доруобуйаҕын санаа. Бу уодаһыннаах ыарыынан ыалдьыбыт дьон тугу кэпсииллэрин иһит.
— Быһыы ылбыт киһи тоҕо мааскалаах сылдьыахтааҕый?
— Мааска харыстыыр.
— Быһыыны медиктэр бары ылаллар дуо?
— Медиктэр байыаннай эбээһинэстээх дьон.
— Нэһилиэнньэ хас бырыһыаныгар Саха сиригэр быһыы биэрээри гынаҕытый?
— 65 бырыһыаныгар.
— Саха сиригэр күүһүнэн быһыыны биэриэхтэрэ дуо?
— Биһиги көҥүл дойдуга олоробут.
— Оттон быһыыны ыларга күһэйдэхтэринэ?
— Күһэйбит салайааччыттан суругунан ылан баран, Идэлээх сойуустарга барыаххытын сөп.
— Ковиды утары охсуһар суһал ыстаап хайдах үлэлиирий?
— Өрөспүүбүлүкэҕэ бу дьаҥ хаптайарын туһугар үлэлиир, сэрэтэр үлэни киэҥник ыытар, бу үлэтин тохтоппот. Мааска эрэсиимин умнумаҥ.
Чокуурдаахтан Николай: — Кэргэмминиин, уолбунуун ыалдьыбыппыт. Антитела үөскээбитин дуу, суоҕун дуу хантан билэбит?
— Антитела ахсаанын билии тугу да эппэт.
— Хамсык кэмигэр тутуу барда дуо?
— Баран. Төһө да ыарахаттар баалларын үрдүнэн тутуу тохтообото. Онон оскуолалар, дьыссааттар уо.д.а. кэмигэр үлэҕэ киириэхтэрэ.
— Олохсуйбут ыарыылаах дьоҥҥо ханнык вакцина барсарый?
— Мин луохтуур буолбатахпын. Чопчу эмчиттэр этиэхтэрэ.
— 65+ саастаахтар дьиэлэригэр олоруохтаахтар дуо?
— Маннык саастаах дьон уулуссаҕа, уопсастыбаннай миэстэлэргэ сылдьар буоллахтарына, ИДьМ сотрудниктара бэрэбиэркэлээн, сэрэтэр үлэ ыыталлар. Кинилэр 6500 тахса киһини кытта кэпсэттилэр.
— Элбэх оҕолоохтор сир хаһан ылыахтарай?
— Онно тустаах уочарат баар.
— Ковидынан ыалдьыбыт дьон быһыыны хаһан ылыахтарын сөбүй?
— Сөптөөх болдьох аастаҕына, быраас хаһан ыларгын этиэҕэ.
— Оскуола иннинээҕи үөрэх тэрилтэтин педагогтарын быһыыны ыларга тоҕо эбээһинэстииллэрий?
— Ким эһигини эбээһинэстээбитин билбэппин.
Ольга Валерьевна истээччилэргэ анаан эппитинэн, ковид-19 дьаҥар сутуллуу син биир тохтообот. Ол курдук, Алдан, Мииринэй, Нерюнгри оройуоннарыгар, Мэҥэ Хаҥаласка, Бүлүүгэ дьаҥ хаптайа илигэ бэлиэтэнэр. Ол эрээри бу ыарыыттан чөлүгэр түһэрэр кииннэр арыллыбыттар, онно эмтэнэргэ олохтоох социальнай сулууспалартан ыйыталаһыахха наада. Биһиэхэ вакцина 2 көрүҥэ баар эбит.
Кэпсэтиигэ Алдан олохтоохторо көхтөөхтүк кытыннылар. Баһылыктарын С.Поздняков доруобуйатын туругун кытта ыйыттылар. Маны сэргэ, өрөспүүбүлүкэ төрүттэмитэ 100 сылыгар бэлэмнэнии туругун, 2 №-дээх өрөспүүбүлүкэтээҕи балыыһа Лор отделениета хаһан аһылларын туоһуластылар.
Түмүккэ Ольга Валерьевна өрөспүүбүлүкэ олохтоохторугар чэгиэн доруобуйаны баҕаран туран, быһыыны баҕа өттүнэн ылалларыгар ыҥырда.
Бэлэмнээтэ Женни Стрюкова
Хаартыска: интэриниэттэн