«Эмтээх үүнээйилэри Лена Кривошапкина сүбэтинэн хомуйуохпут»

Бөлөххө киир:

«Айар» кинигэ кыһатын «Суруйааччыны кытары сарсыардааҥҥы аһылык» бырайыага бу сылга тохсунньу 5 күнүттэн саҕаланна.

Бу күн Курашов уулуссатыгар «Тото-Хана» эрэстэрээҥҥэ кэлбит ааҕааччылар Лена Кривошапкинаны кытары көрсүһүүгэ Саха сирин эмтээх үүнээйилэрин, ону хайдах хомуйар туһунан уо.д.а. сүбэлэри ыллылар.

Лена Кривошапкина Саха сирин эмтээх үүнээйилэрин химическэй састааптарын үөрэтэр, эмп оҥорор науканан, эмтээх үүнээйилэринэн 20-тэн тахса сыл  дьарыктанар,   “Иллюстрированный определитель лекарственных растений Якутии” кинигэ ааптара, провизор, фармация наукатын хандьыдаата.
Кини бу күн сүрүннээн Саҥа дьыл бырааһынньыгын, кэмигэр, уһун өрөбүллэргэ эмтээх оттор көмөлөрүнэн доруобуйаны хайдах көннөрөр туһунан кэпсэтиини таһаарда. Лена Георгиевна билиитин-көрүүтүн, туһалаах эрэсиэптэрин олус тиийимтиэтик быһаарда. Мустубут дьон доруобуйа туһугар сүҥкэн үлэ оҥоһуллубутун сөхтүлэр уонна махтаннылар.
«Хас биирдии үүнээйи Ийэ сир эрчимин уонна Үрдүк Үрүҥ Аар Тойон күүһүн илдьэ сылдьар. Онон, эмтээх үүнээйини хому­йарга айылҕаҕа үтүө, ыраас санаалаах эрэ барыллар. Хомуйарга айылҕаттан көҥүллэтиллэр  уонна хомуйбут үүнээйилэриҥ эмтиир хаачыстыбаларын сүтэрбэттэригэр көрдөһүллэр. Хас биирдии үүнээйи махталга, харыстабылга уонна тапталга наадыйар. Элбэҕи буолбакка, бэйэҕэр төһө наадатын эрэ хомуйуллар», -– диэн  фармация наукатын хандьытаата  отунан-маһынан эмтэнэн, доруобай буолар туһугар үүнээйини хомуйуу сиэрин -туомун билиһиннэрдэ.


«Бу көрсүһүүгэ ааптар  кинигэтин уонна эмтээх от атыылаһан, дьиэбэр илии тутуурдаах кэллим. Иллюстрированный определитель лекарственных растений Якутии” диэн дьоһуннаах кинигэтин иһин махтанан туран, сыралаах үлэтигэр өссө да ситиһиилэри, этэҥҥэ буолууну баҕарабын. Лена Георгиевнаттан тугунан да сыаналаммат бэлэҕи тутан, дууһабыт сырдаан, чэпчээн, кэҥээн, ып-ыраас халлааҥҥа уйдаран көтөбүт. Үрдүк күүстэргэ үҥэбит. Маннык турукка киирэрбитигэр Лена Георгиевна көҥүл аартыгы арыйан биэрдэ», -– диэн биир ааҕааччы махталын биллэрдэ.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0