Эмтээх үүнээйилэр тустарынан халандаар таҕыста

Бөлөххө киир:

“Иллюстрированный определитель лекарственных растений” кинигэ ааптара, фармация наукатын хандьыдаата Лена Кривошапкина Саха сирин олохтоохторугар кэлэр сылы көрсө күндү бэлэҕи оҥордо.


Ол курдук, Саха сирин эмтээх үүнээйилэринэн 20-тэн тахса сыл дьарыктанар Лена Кривошапкина эмтээх үүнээйилэри хомуйуу быраабылаларыгар анаммыт 2020 сыллааҕы халандаары оҥорбут.
Истиэнэҕэ ыйанар халандаарга эмтээх от аата, ханнык ыйтан ханнык ыйга диэри хомуллара, үүнээйи хайдах туруктаах эрдэҕинэ хомуллара табыгастааҕа, ханнык ыарыыларга туһаныллара, оҥоһуллар ырысыаба барыта сиһилии суруллубут. Барыта 18 эмтээх үүнээйи киллэриллибит. Биир сиргэ ыйаан туран, сыл хайа кэмигэр хайдах дьаһанары көрө сылдьарга олус табыгастаах. Этэргэ дылы, бэйэтэ ыйынньык. Халандаары туһанан бүппүт да иһин, кырыйан ылан уура сылдьарга ананан толкуйдаммыт бэртээхэй үлэ буолбут.

Холобур, долохунаны хаһан, хайдах хомуйар эбиппитий?

Долохунаны аһа сиппит кэмигэр, атырдьах ыйын 15 күнүттэн балаҕан ыйын 10 күнүгэр диэри хомуйуллар. Ханнык ыарыыларга туһаныллара: сүрэх-тымыр үлэлэрин кэһиллиилэригэр, сүрэх тэбиитин уларыйыытыгар, атеросклерозка, утуйбат буолууга, гипертония саҕаланыытыгар. Оттон сибэккилэрэ үүнээйи аһынааҕар күүскэ дьайаллар.
1 остолобуой ньуоскаҕа 200 мл итии ууну кутан баран, хаппаҕынан сабыллар, оргуйа турар уулаах иһиккэ ититиллэр, 10 мүнүүтэ тымнытыллар, сүүйэн кутуллар уонна хаалбытын ыгыллар. Күҥҥэ иккитэ-үстэ аһыаҥ 30 мүнүүтэ иннинэ ыстакаан 1/3-1/2 иһиллэр.

Саха сирин эмтээх үүнээйилэрин тустарынан халандаары “Книжная лавка” уонна “Якутский книжный дом” маҕаһыыннартан атыылаһыахха  сөп.

Надежда ЕГОРОВА, «Саха сирэ» хаһыат, edersaas.ru 

+1
0
+1
0
+1
0
+1
0
+1
0
+1
0
+1
0