Доруобуйа Уопсастыба

Эмп сыаната аптекаларга тоҕо араастаһарый?

Бүгүн, алтынньы 27 күнүгэр, «Талбан» биэриигэ Росздравнадзор Саха сиринээҕи управлениетын салайааччытын солбуйааччы Изабелла Винокурова ыалдьыттаата.

Биэрии кэмигэр батсаап ситимин нөҥүө көрөөччүлэртэн элбэх ыйытыы киирдэ. Ол курдук, дьону ордук аптекаларга эмп сыанатын араастаһыыта долгутар эбит. «Тоҕо «Гриппферон» хааппылата спрейдээҕэр сыаната ыараханый?» диэн ыйыттылар.

Изабелла Винокурова маннык хоруйдаата:

— Киһи олоҕор наадалаах эмтэр испииһэктэрэ баар. Судаарыстыба сыл  аайы ханнык эмтэри бу испииһэккэ киллэрэрин саҥардар. Манна уопсайа 20 тыһыынча эмп киирэр. «Арбидол», «Ингаверин», «Парацетамол», «Гриппферон» манна киирэллэр. Ол эрээри, холобур, «Гриппферон» хааппылата эрэ бу испииһэккэ киирэр. Ыстарар көрүҥэ киирбэт. Ол иһин киирбэтэх эмтэри аптекалар бэйэлэрэ сыаналыыллар.

Биһиги эмп сыаната араастаһыытын хонтуруоллуубут. Аны бу аҕыйах кэмтэн бэттэх эмтэри маркировкалааһын баар буолбута. Ол саҥа эмтэр маркировкаланалларыгар кыратык бытаарыы буолбута. Билигин барыта үчүгэй. Өрөспүүбүлүкэҕэ сүүсчэкэ аптека ханнык эмтэр баалларын иһитиннэрэ олорор.

Ульяна Захарова, «Саха сирэ» хаһыат, edersaas.ru

Хаартыска — bliznesy.ru саайтан.

0
0
Telegram @edersaas20

Добавить комментарий