“Росздравнадзор” салайааччыта Евгений Иннокентьев социальнай ситимнэргэ быһа эпииргэ тахсан, аптекаҕа төһө эмп-томп баарын, сыана хайдах олохтонорун, о.д.а. кэпсээтэ.
Судаарыстыба олоххо улахан суолталаах эмтэр эрэ сыаналарын хонтуруоллуур. Маннык испииһэккэ киирбит эмтэргэ оҥорон таһаарааччылар, тиэйэн аҕалааччылар уонна атыылыыр аптекалар сыанатын бас-баттах үрдэтэр бырааптара суох. Оннук кэһии таҕыстаҕына, лицензияларын былдьатыахтарын сөп. Ол иһин аптекалар, сыһыаннаах тэрилтэлэр бу ирдэбили бэркэ билэллэр. Кэнники 5 сылга маннык кэриҥнээх 2 кэһии эрэ тахсыбыт.
Сыананы олохтуурга 3 зона көрүллэр. Ол эбэтэр, төһөнөн ыраах да, соччонон сыаната эмиэ үрдүүр. Ону тэҥэ, эмп биир ааттаах эрээри, хаҕа, дозата, көрүҥэ атын буолан, сыаната эмиэ араастаһыан сөп.
Олоххо улахан суолталаах эмтэр испииһэктэригэр киирбэтэх эмтэргэ сыананы тиэйэн биэрээччилэр, аптекалар бэйэлэрэ олохтууллар. Бу битэмииннэргэ, БАД-тарга, сорох вируһу утары охсуһар эмтэргэ сыһыаннаах. Холобур, бу кэлин тумууну, коронавируһу эмтииргэ туһаныллар буолбут “Гриппферон” хааппылалаах бытыылкатын сыанатын судаарыстыба хонтуруоллуур (испииһэккэ баарын иһин). Онтон муннуга ыстарыллар спрей быһыытынан оҥоһуллубут бытыылката испииһэккэ суох буолан, сыаната быдан үрдүк, хонтуруолламмат эбит.
Евгений Иннокентьев сотору кэминэн коронавируһунан ыалдьыы муҥутуур чыпчаалын булан баран, түһэр, аҕыйыыр балаһыанньаҕа киириэ диэн эттэ.
Ангелина Васильева, «Саха сирэ» хаһыат, edersaas.ru