2020 cылтан быраас анаабыт эмин атыылаһарга НДФЛ нолуоктан социальнай көҕүрэтии (вычет) оҥоһуллуон сөп. Атыылаһыллыбыт суума 120 тыһыынчаттан тахсыа суохтаах. Бу туһунан сокуону Федерация Сэбиэтин мунньаҕар бу күннэргэ көрүөхтэрэ.
edersaas.ru
Билигин дьон быраас анаабыт эмин бэйэлэрин харчыларыгар атыылаһан баран, нолуоктан көҕүрэтии оҥортороллор. Ол гынан баран, РФ бырабыыталыстыбата олохтообут испииһэгэр киирэр 400 эмтэн атыҥҥа көҕүрэтии оҥорботтор.
Оттон бу сокуон үлэҕэ киирдэҕинэ, 400 эминэн хааччахтааһын сүтэр. Ону тэҥэ, чааһынай дьон дохуотугар түһэр нолуок кэккэ компенсационнай төлөбүрдэриттэн НДФЛ-лы сотоллор. Оччоҕо, холобур, радиацияттан доруобуйалара эмсэҕэлээбит, “Арассыыйа Бочуоттаах донора” бэлиэнэн наҕараадаламмыт, “Земский доктор”, “Земский фельдшер” бырагыраамаларынан 1 мөлүйүөн солк. ылбыт дьон, уо.д.а. НДФЛ-тан босхолоноллор.
Оҕо төрөөбүтүгэр, эбэтэр инбэлиит оҕону көрөргө эбии өрөбүл күннэри ылбыт төлөбүргэ, босхо бэриллэр сир учаастагын оннугар харчынан ылбыт дьон дохуоттара НДФЛ-тан босхолоноллор.
Уһук Хоту олорор дьон Арассыыйа иһигэр барар-кэлэр ороскуоттарын төлөбүрүгэр (үлэни биэрээччи төлөөтөҕүнэ) НДФЛ эмиэ сотуллуохтаах.
Ангелина ВАСИЛЬЕВА, “Саха сирэ” хаһыат, edersaas.ru