Өрөспүүбүлүкэ экэниэмикэтин сайыннарыыга суһал ыстаап мунньаҕар кэккэ көмө миэрэлэрин киллэрэр туһунан быһаарыстылар. Бүддьүөттэн ылан, сэдэх орфаннай ыарыылаах дьону эмтииргэ анаан 231 мөлүйүөн солкуобай суумалаах эмп саппааһын хаһааныахтара. Ону тэҥэ, 8-15 саастаах оҕолорго бэриллэр ыйдааҕы төлөбүргэ 412 мөлүйүөн солкуобайы тыырдылар. Оттон федеральнай бүддьүөттэн оҕолоох дьиэ кэргэттэргэ 6 миллиард солкуобай кэриҥэ көрүллүө. Төлөбүр кээмэйэ – 9700 солкуобайтан 23 000 солкуобайга диэри.
Федеральнай таһымҥа элбэх көмө оҥоһуллар. Онтон сүрүннэрэ – аччыгый уонна орто биисинэскэ анаан чэпчэтиилээх кирэдьииттэри биэрэллэригэр диэн бааннары субсидиялыахтара. Бөдөҥ, стратегическай суолталаах тэрилтэлэр ылбыт кирэдьииттэригэр чэпчэтиилээх кэрчик кэм көрүллүө. Урбаанньыттар уонна дьон кирэдьиит каникулунан туһанар кыахтаннылар. Мантан да атын көмө миэрэлэрэ бааллар.
Оттон өрөспүүбүлүкэтээҕи таһымҥа бастатан туран оҥоһуллуохтаах дьайыылар былааннарын ылыммыттара. Ол курдук, бородууктаны хаһааныы, Уһук Хоту улуустарыгар таһаҕаһы тиэрдии, нэһилиэнньэ дьарыктаах буолуутугар, тутуу салаатын, салгын тырааныспарын, урбаанньыттары өйөөһүн, о.д.а. суһалы быһаарыныылар ылыныллыбыттара. Омук сириттэн атыылаһыллыахтаах импортнай тэриллэри атынынан солбуйуу боппуруостара быһаарыллаллар.
Ону тэҥэ, нэһилиэнньэ дохуота намтаабатыгар уонна эминэн хааччыйыыга болҕомто ууруллар. Онон, бары өттүнэн, бу көмө миэрэлэригэр уопсайа 14 миллиард 100 мөлүйүөн солкуобай көрүллүөхтээх.
Ил Дархан Айсен Николаев министиэристибэлэр уонна биэдэмистибэлэр салайааччыларын федеральнай уорганнары кытары күүскэ үлэлииллэригэр, этиилэри киллэрэн, туруорсан иһэллэригэр соруйда. Москваҕа баар СӨ Бастайааннай бэрэстэбиитэлистибэтэ кинилэргэ көмөлөһүөҕэ.
Ангелина Васильева, “Саха сирэ” хаһыат, edersaas.ru